Spiropali: PS nis procedurat për shkarkimin e Metës...Zhdekretimi akt brutal (VIDEO)

Zëdhënësja e qeverisë Elisa Spiropali tha se vendimi i presidentit Ilir Meta për anulimin pa afat të zgjedhjeve të 30 qershorit, është një akt brutal mbi republikën parlamentare. Ajo tha se të enjten në Kuvend, mazhoranca do të nisë procedurën e shkarkimit të Presidentit Meta.

Pas mbledhjes së kryesisë së PS-së, në një prononcim për mediat, Spiropali tha se nuk ekziston në asnjë pikë të kushtetutës fjala zhdekretim. Vendimi i Metës - zbuloi Spiropali - do të kalojë për shqyrtim në Komisionin Qendror të Zgjedhjeve dhe më tej në Kolegjin Zgjedhor.

"Partia Socialiste ka diskutuar mbi aktin brutal të Ilir Metës mbi Republikën Parlamentare të Shqipërisë. Kryesia e Partisë Socialiste ka vendosur që të enjten, në seancën plenare, të zhvillojë një debat të gjatë parlamentar duke shtjelluar të gjithë argumentet se si Ilir Meta ka sulmuar brutalisht Republikën dhe ka shpikur një institucion që nuk ekziston në asnjë vend të botës, në asnjë Kushtetutë, të quajtur ç’dekretim.

Ky debat do t’i përmbledhë të gjithë argumentet tona. Në fund do ti takojë Kolegjit Zgjedhor apo Komisionit Qendror të Zgjedhjeve ta shqyrtojë nga pikëpamja juridike. Ne si Kryesi e Partisë Socialiste mendojmë se Ilir Meta e ka humbur të drejtën për të qëndruar në atë pozicion dhe Parlamenti i Shqipërisë do fillojë procedurën e shkarkimit të Ilir Metës nga posti i Presidentit të Republikës".

Kur do nisë procedura znj.Spiropali?

Do të nisë menjëherë në seancën parlamentare të së enjtes, ku të gjithë argumentet do shtjellohen plotësisht. Është detyra jonë politike për të mbrojtur Kushtetutën, rendin kushtetues dhe Republikën parlamentare.

Shkarkimi kërkon 94 vota dhe Gjykatë Kushtetuese e cila nuk funksionon?

Do t'i takojë Gjykatës Kushtetuese në fund, ashtu siç edhe ligji e parashikon, por kjo nuk na heq neve të drejtën për të filluar procesin e shkarkimit të Ilir Metës.

Çfarë do ndodhë me 30 Qershorin?

Më 30 Qershor do të kemi zgjedhje në Republikën e Shqipërisë.

S’kemi një datë znj.Spiropali?

Data është 30 Qershor.

Lajmi kryesor:

PS mbledh firmat/ Rama: Të enjten rezolutë për shkarkimin e Metës! (Depozitohet kërkesa)

G.M./b.ha./Shqiptarja.com

TAG:
• PS
• elisa spiropali
• seanca e kuvendit 13 qershor 2019
• zhdekretimi i 30 qershorit