Sterilizimi/ Byrazeri: Do e firmosja përsëri Fizibilitetin, ndërhyrja e nevojshme! Koncesionin mund ta marrë edhe shteti, por shërbimet duhen se shpëtojnë jetë

Pjesa e fundit e mbledhjes së Komisionit të Shëndetësisë për Koncesionet e Sterilizimit dhe Check-Up u përqendrua tek pyetjet që deputetët anëtarë të forcave politike i drejtuan mjekut dëshmitar, ish-anëtarit të komisionit, Genc Byrazeri.

I pyetur nëse do e bënte dhe firmoste përsëri tani një studim fizibiliteti të tillë, duke iu referuar statistikave dhe shifrave zyrtare, ai e pohoi, por ndau aspektin personal nga ai profesional. Byrazeri theksoi “periudhën shkatërruese” që të shkakton kjo lloj dinamike dhe ekspertizë, e që ndikon në familje, por profesionalisht këmbënguli se do e bënte përsëri.

“Nuk do t’i hiqja asnjë presje atij studimi Fizibiliteti. Po do e bëja përsëri, pa mëdyshje. Sepse ishte dhe është i nevojshëm. Do ishte kriminale të mos bëhej. Ndërhyrja duhej bërë se s’bën, shifrat dhe situata ishin alarmante dhe tani tregon se kanë ndryshuar”, tha ai. Ndërsa këmbënguli se tani gjendja në spitale përsa i përket pjesës së infeksioneve dhe kontaminimit është përmirësuar ndjeshëm dhe ka siguri gati maksimale, duke këshilluar shqiptarët që “të mjekohen dhe operohen në shtet”.  

LEXO EDHE:
Sterizilimi/ Kushëriri i Beqajt dëshmon në Komision Hetimor, mjeku Genc Byrazeri: Firmosa vetëm studimin e fizibilitetit! KLSH s’merr vesh nga termat mjekësorë

I pyetur për mendimin e tij nëse ky standard shërbimi duhet të vazhdojë, Byrazeri dha mendimin e tij si specialist pohues, pasi theksoi se “shpëtohen jetë”.

“Duhet të vazhdojë, sepse një dite e munguar e këtij shërbimi, është katastrofike. Mjekësia nuk është matematikë, investimet duhen bërë, nuk mund të parashikosh në fund rezultatet. Por sikur një jetë të shpëtosh, është shumë e vlefshme dhe tregon se ia vlen. Jeta nuk ka çmim”, tha ai.

Në fund bëri edhe një propozim se këto shërbime mund të mos vijonin siç janë bërë, por më afatshkurtra dhe të monitoruara.

“Mund ta marrë edhe vetë shteti, por në disa procedura do ishte e vështirë, edhe pse profesionalizimi nuk mungon, por në të 6 shërbimet do ishte e vështirë dhe sfiduese për shtetin. Por në disa shërbime mund të realizohet, ta marrë shteti. Këto koncesione apo tenderime mund të bëhen me periudha më të shkurtra dhe kontroll më të rreptë, me raportime mujore apo gjashtëmujore. Edhe një jetë të shpëtojë, diskutimet tona të mëtejshme janë pa moral”, tha mjeku.

Byrazeri shkaktoi edhe ilaritet tek disa nga deputetët me një prej deklaratave të tij, kur shpjegoi aspektin personal të kësaj pune dhe impaktin që kishte te familja (duke përfshirë edhe lakimin e emrit të tij apo hetimin parlamentar), teksa kujtoi se në vendin tonë ka “shoqëri të prapambetur”, e cila ndikon te gjithkush.

Lajmi kryesor:

Sterizilimi/ Kushëriri i Beqajt dëshmon në Komision Hetimor, mjeku Genc Byrazeri: Firmosa vetëm studimin e fizibilitetit! KLSH s’merr vesh nga termat mjekësorë

A.Q/r.k./Shqiptarja.com

TAG:
• Albana Vokshi
• genc byrazeri
• koncesioni i sterilizimit
• komisioni hetimor per shendetesine