Strakosha bëhet 'mur', Lazio ëndërron titullin

8 fitore radhazi, jo e impenjuar në Kupat e Europës dhe Interi e Juvja vetëm tre pikë larg. Lazio ëndërron titullin kampion në Serinë A. Bardhekalëtrit fituan mbrëmë me përmbysje 2-1 ndaj Cagliarit në Sardenjë duke siguruar tre pikë të pabesueshme. Vendasit morën avantazhin me sulmuesin Simeone që në minutën e 8-të që mposhti Strakoshën. Tek goli portieri i Kombëtares nuk kishte çfarë të bënte por më pas u bë “mur”  dhe mbajti Lazion në lojë me dy pritje spektakolare ndaj Joao Pedro e mbi të gjitha ndaj Nainggolan. Gardiani u vlerësua me notën 7 duke qenë një nga më të mirët në fushë.

 Lazio përmbysi gjithçka në 7 minutat e kohës shtesë. Fillimisht barazoi Luis Alberto në minutën e 93-të ndërsa golin e fitores e shënoi Caicedo kur kishte shkuar minuta e 8-të shtesë duke kaluar në ekstazë gjithë ambientin bardhekaltër. 3 pikë larg ekipeve të kreut ndodhet Lazio dhe pse jo është kandidate për titull ndërsa të dielën do të tentojë të fitojë Superkupën ndaj Juventusit. /Përgatiti Andi Kapxhiu/

TAG:
• Seria A
• thomas strakosha
• juventus
• Inter
• lazio