Studimi
Plot 900 fëmijë të moshës 13 deri në 18 vjeç janë pyetur në të gjithë vendin në zona rurale dhe urbane sa i përket përdorimit të internetit. Shumica dërrmuese e tyre kanë pohuar se kanë një adrese në rrjetet sociale ndërkohë që edhe janë ngacmuar nga të huaj. Studimi tregon se 44% e fëmijëve shohin çdo dite materiale pornografike, 47% pranojnë se janë kontaktuar nga te panjohur shqiptare e te huaj, këta të fundit kryesisht britanike, italianë dhe amerikanë.
Organizatat në mbrojtje të fëmijëve rekomandojnë aktivizimin e filtrave për sigurinë online të fëmijëve. Por, për ministrin e Mirëqenies Sociale, Blendi Klosi filtri më i mirë janë vetë prindërit ndërsa ka sjellë edhe shembullin e tij personal. “Kam një betejë të humbur me vajzën që është e vogël kur ma merr telefonin nga dora pasi unë e kam të vështirë që t’ia marr asaj prapë. Ne mund të bëjmë shumë filtra, por unë mendoj dhe jam shumë mbështetës i tezës se filtri më i madh është marrëdhënia e prindit me fëmijën”, ka pohuar Klosi.
Siguria online
Ministrat përgjegjës por edhe përfaqësues të organizatave të ndryshme kanë pohuar se e rëndësishme është vendosja e filtrave në mënyrë që fëmijët të mos kenë akses në çdo faqe interneti. “Vendosja e filtrave në masë është detyra kryesore që na nevojitët. Por nga ana tjetër duhet të ketë edhe ndërgjegjësim për prindërit dhe mësuesit” këshillojnë ekspertët. Ministrja e Shtetit për novacionin ka pohuar se fëmijët nuk mund të ndalohen të navigojnë në internet por ndaj tyre duhet të ketë një informim maksimal mbi rreziqet. “Është e pamundur t’i ndalosh fëmijët të kenë akses, gjithë çështja është përgjithësimi i tyre, maturimi dhe informimi në mënyrë që gjërat që shikojnë t’i absorbojnë ashtu siç duhet” ka pohuar Harito.
Masat e marra
Në Ditën Botërore të Internetit të Sigurt, katër ministra u angazhuan për t’u ofruar fëmijëve siguri online. Krahas rekomandimeve për internetin e sigurt te fëmijëve, këshilla u lëshuan edhe ndaj prindërve, te cilët duhet te kenë me ne kontroll aktivitetin e fëmijëve te tyre. “Është me vend ajo fjala ku fëmijët e keq janë produkt i një prindi të keq. Të rriturit sot, dhe këtu nuk po përjashtoj askënd, po japim modelet e gabuara se si duhet të rriten fëmijët nesër” ka pohuar Ministri i Brendshëm Saimir Tahiri. Nga ana tjetër ministrja Nikolla ka pohuar se do të ketë një bashkëpunim e operatorët e ofrimit të internetit në mënyrë që të kemi një internet të sigurt në shkollat shqiptare. Gjate aktivitetit u prezantua edhe platforma kombëtare “Internet i Sigurt”, i cili do të shërbejë për raportime dhe ndërgjegjësimin e prindërve.
Shifra dhe të dhëna nga studimi
900 fëmijë janë përfshirë në studim dhe u përkasin zonave rurale dhe urbane
13 deri në 18 vjeç është mosha e fëmijëve të cilët janë përfshirë në studim
80-85% e fëmijëve kanë kompjuter me internet në dhomën e tyre
47% kanë raportuar se janë ngacmuar nga një shtetas i huaj i rritur gjatë kohës që kanë qenë në internet
45% kanë përjetuar tallje on line apo vjedhje të profilit të tyre të Facebook.
44% e tyre kanë raportuar se shohin materiale pornografike
Redaksia Online
(F.T/shqiptarja.com)