Tensionet në Ukrainë, Rama: Shqipëria rol aktiv në këtë çështje, një qëndrim me SHBA në OKB dhe bashkëautorësi për çdo projekt paqeje! Kjo na rrit besimin në arenën ndërkombëtare (VIDEO)

Ambasadorja Amerikane Yuri Kim, ka reaguar pas deklaratës së kryeministrit Edi Rama dhe ministres së Jashtme Olta Xhaçka se vendi ynë dhe SHAB do të jenë bashkëpenëmbajtës në çështjen e Ukrainës në përplasjen e saj me Rusinë.

Ajo shprehet se SHBA e vlerëson lidershipin e Shqipërisë në Këshillin e Sigurimit të OKB-së. Kim shkruan se agresioni i Rusisë nuk po kërcënon vetëm Ukrainën dhe Evropën, por edhe rendin ndërkombëtar.

“SHBA vlerëson lidershipin e Shqipërisë në Këshillin e Sigurimit të OKB-së, si mbajtëse me ne për çështjen e Ukrainës . Agresioni i Rusisë jo vetëm që kërcënon Ukrainën dhe Evropën, por rendin ndërkombëtar për të cilin Këshilli i Sigurimit i Kombeve të Bashkuara është ngarkuar të ruajë.”, shkruan ambasadorja.

Kryeministri Edi Rama i është përgjigjur letrës së Rusisë, ku kërkonte angazhim që të respektojë sipas saj detyrimet që i japin marrëveshjet ndërkombëtar. Rama tha se Rusia nuk është vend armik i Shqipërisë, por në lidhje me konfliktin me Ukrainën, ndajnë qëndrime të ndryshme. Akuzave të Berishës, Rama iu përgjigj duke thënë se është 'zhurmë folkloirike në katundin e PD'

"Ajo letër i drejtohet të gjithë vendeve anëtare të NATO-s dhe OSBE. Asnjë qeveri nuk është marrë me atë letër publikisht, Çdo qeveri e ka marrë e ka lexuar, po e lexon ndërkohë që qëndrimet tona janë të qarta, janë të drehjta dhe nuk kemi asnjë problem në marrëdhëniet tona bilaterale me Rusinë, Rusia nuk është vend armik i Shqipërisë, por kemi ndarje të qartë në këtë pikë dhe gjithë zhurma për letrën është pjesë e një zhurme folklorike në katundin e PD. Nuk ka lidhje fare me ne dhe me qeverinë dhe marrëdhëniet ndërkombëtare. Është zhurmë mes të marrë që kanë marrë peng qytetarët", tha Rama.

Ministri i Jashtëm rus Sergey Lavrov, u ka dërguar SHBA-ve, Kanadasë dhe disa vendeve evropiane, mes tyre edhe Shqipërisë, një letër ku kërkon angazhim nga këto vende që të respektojnë sipas saj detyrimet që i japin marrëveshjet ndërkombëtare. Sipas Rusisë vendet perëndimore vazhdojnë të nxjerrin prej saj vetëm ato elemente që u përshtaten atyre, dhe konkretisht – të drejtën e shteteve për të qenë të lirë të zgjedhin aleancat për të garantuar ekskluzivisht sigurinë e tyre. Kjo letër është konsideruar nga ish-Kryeministri Berisha si një kërcënim i hapur, ndërsa tha në Kuvend të enjten se Kryeministri Rama po hesht. Për Berishën ishte një letër që është dërguar nga ambasada ruse në Tiranë. 

Kryeministri Edi Rama tha se vetmja zgjidhje për uljen e tensioneve mes Ukrainës dhe Rusisë janë bisedimet dhe se Shqipëria mbështet këtë linjë. lidhur me rolin aktiv që iu dha Shqipërisë për të qenë partnerë me SHBA për të ndërmarrë veprime në lidhje më këtë çështje, Rama e quajti njohje të potencialit të vendit tonë dhe jo qokë.

"Qëndrimet tona lidhur me këtë çështje në vijim janë të qarta dhe të  njohura dhe të pandryshuar dhe nga ana tjetër theksoj se në këndvështrimin tim rruga për të adresuar këtë tension që rritet çdo ditë dhe këtë konflikt është rruga e dialogut dhe bisedimeve në këtë përballje elefantësh. Është rruga e gjetjes së të gjitha arsyeve të mundshme për të biseduar dhe për të kërkuar me durim pikat e përbashkëta edhe pse në dukje janë të vështira për tu gjetur. Roli ynë aktiv tregon se na njihet e drejta dhe potenciali për të dhënë një kontribut ekstra në lidhje me këtë çështje. Nuk jemi në fushën e qokave, por këtu bëhet fjalë për të krijuar një partneritet një dyshe që do të angazhojë Këshillin e Sigurimit për këtë temë dhe jo vetëm. ne kemi planin tonë në këtë pjesë, kemi ndarë idetë tona me partnerët dhe do të kemi mundësi që në këto dy vite të luajmë një rol duke shfrytëzuar peshën e mardhe që i jep këtij çiftëzimi partneri tjetër, SHBA", tha Rama.

Ministrja e Jashtme, Olta Xhaçka tha sot se SHBA është treguar e gatshme për të ndarë me vendin tonë përgjegjësinë e bashkautorësisë për çështje të paqes dhe sigurisë, veçanërisht në lidhje me Ukrainën. Para gazetarëve, Xhaçka u shpreh se Bashkëhartuesit janë të parët që flasin për çështjen në fjalë në  takimet e Këshillit të Sigurimit dhe se projekti i parë do hartohet nga Shqipëria dhe SHBA dhe më pas do ndahet me të tjerë.

"Ne kemi një bashkëpunim të ngushtë me SHBA. Gjatë këtij bashkëpunimi që do materializohet përmes takimeve që do kemi në Uashington me Blinken, kemi krijuar një sinergji të veçantë lidhur me angazhimin e vendeve tona, edhe sa i takon çështjes së paqes dhe sigurisë, veçanërisht me situatën e konfliktit të Ukrainës. SHBA kanë qenë të gatshme të ndajnë me Shqipërinë përgjegjësinë  e bashkautorësisë apo bashkëpenëmbajtësit për çështje që kanë lidhje me sigurinë dhe paqen dhe veçanërisht me Ukrainën. Është vlerësim dhe privilegj i jashtëzakonshëm për të bashkëndarë me SHBA përgjegjësinë për të qenë bashkëhartues në çështjen e Ukrainës, nj kontribut që jemi të gatshëm për ta marrë përsipër. Jemi të vetëdijshëm për përmasat tona, por kjo është çështje serioziteti, përgatitje dhe aftësie për të marrë përsipër përgjegjësi. Vendi ynë merr një rol të dorës së parë në çështje të sigurisë përmes bashkëhartimit me SHBA për çështjen e Ukrainës. Vendet tona do bashkëpunojnë ngushtë, do ndajnë informacion në mënyrë prioritare dhe do jenë në origjinë të çdo nisje me këtë nismë. Projekti i parë do hartohet nga dy vendet tona dhe më pas do ndahet me të tjerë. Bashkëhartuesit janë të parët që flasin për çështjen në fjalë në  takimet e Këshillit të Sigurimit. Është një shprehje e thellimit të partneritetit strategjik të dy vendeve", tha Xhaçka.