Receta

Të gatuajmë me zonjën Vjollca/ Biskota të mbushura me mollë e arra dhe Krahë pule pikante të pjekura në tigan. Anila fiton kuizin "Sa kushton receta"!

Si çdo të premte edhe sot në “Rreze Dielli”, përveçse sollëm dy receta fantastike nga zonja Vjollca, u argëtuam me rubrikën-quiz “Sa kushton receta?” . Telefonuesja me emrin Anila fiton kuizin duke gjetur shumën e saktë të përbërësve. Receta 'Biskota të mbushura me mollë e arra' ka një kosto totale prej 480 lekësh.

Redaksia 17 Janar 2020, 11:06 | Përditesimi: 17 Janar 2020, 13:43

Biskota të mbushura me mollë dhe arra

Përbërësit:

LEXO EDHE:
Tavë me lakër arme dhe kimë nga zonja Albana

250 gr gjalp (në temp. ambienti)

1 filxhan kafeje sheqer pluhur

1 lugë gjelle kos

1 lugë çaji sodë buke

2.5 gota miell

Për mbushjen

3 mollë mesatare

1 lugë çaji kanellë

1 filxhan çaji sheqer

80 gr arra ose lajthi.

Përgatitja:

Lajmë dhe qërojmë mollët nga lëkura dhe farat. Tulin e mollës e grijmë në rende nga ana më e trashë. Shtojmë sheqerin dhe e përziejmë derisa molla të mos ketë më lëng, shtojmë kanellë, arra të grira, I përziejmë mirë dhe e lëmë mbushjen të ftohet.

Në një tas tjetër vendosim gjalpin, sheqerin pluhur, kosin, sodën e bukës, ½ e miellit e përziejmë brumin me duar ose robot elektrik duke shtuar herë pas here dhe miellin e mbetur derisa brumi të lidhet e most ë na ngjitet nëpër duar. Ndajmë brumin në 5 kulaçë.

Hapim secilin prej kulaçëve në një petë të vogël me trashësi 3 mm dhe diametër 20 cm. Pasi e hapim petën e ndajmë në 8 pjesë, siç ndahet një picë. Në fillim të çdo pjese vendosim 1 lugë çaji mbushje, pastaj e bëjmë role deri në majën e petës.

Në një tepsi ku kemi shtruar letër kuzhine ose të lyer me pak vaj vendosim biskotat e mbushura me mbyllje nga poshtë.

Vendosim tepsinë në furrë në temperaturë 180 gradë Celsius për 10-12 minuta.

Krahë pule pikante të pjekura në tigan

Përbërësit:

500 gr krahë pule

Kripë dhe piper i kuq pikant

1 lugë kafeje kumin

1 1/2 lugë gjelle ketchup

1 1/2 lugë gjelle kos

Erëzat që preferoni

1 filxhan kafeje vaj ulliri

Përgatitja:

Në një tas vendosim vajin, shtojmë në të salcën ketchup, kripë, piper, kumin, kos, të gjitha së bashku derisa të formohet një masë homogjene. Shtojmë në tas krahët e pulës dhe I përziejmë mirë derisa të lyhen nga të gjitha anët me salcën që përgatitëm. I mbulojmë dhe I lëmë në frigorifer të marinohen 30 minuta deri në 1 orë.

Nxehim një tigan pa yndyrë dhe vendosim në të krahët e pulës, I pjekim ato mirë nga njëra anë dhe I kthejmë të piqen dhe nga ana tjetër.

Shtojmë ½ gotë me ujë të nxehtë dhe I japim një valë nga të dyja anët duke formuar një salcë. E lëmë salcën të trashet dhe më pas e shërbëjmë me sallatë, patate të ziera ose tortilla.