Të gatuajmë me zonjën Vjollca/ Bukë me vezë, djathë e perime dhe Mëlçi pule me verë e rrush

Bukë me vezë, djathë dhe perime

Përbërësit:

4-6 feta bukë

8 kokrra vezë

150 ml pana

200 gr proshutë

250 gr perime miks (qepë të njoma, speca, brokoli)

150 gr djathë cheddar

125 gr mozzarella

Bishta qepe të njomë

Përgatitja: Pastrojmë bukën nga koret dhe pasi të lyejmë një tavë me pak gjalp, vendosim fetat e bukës në të gjithë sipërfaqen e tavës si bazë.

Në një tas vendosim 8 kokrra vezë, shtojmë në të kremin pana dhe i rrahim së bashku. Shtojmë proshutën në kubikë dhe qepën e njomë, pjesën e bardhë, brokolin në lule të vogla, specin në kubikë të vegjël, djathin cheddar në rende dhe po ashtu mozzarellën në rende, kripë dhe piper i zi.

E shtojmë vezën e përzierë në djathë dhe perime mbi bazën me bukë. E spërkatim sipër me bar qepe të grirë imët ose me bishta qepe të grirë hollë. Vendosim tavën në furrë në temperaturë 180 gradë Celsius, për 30 minuta.

Mëlçi pule me verë dhe rrush

Përbërësit:

1 qepë

2 thelpinj hudhra

600 gr mëlçi

50 ml verë të bardhë

80 ml krem pane

150 gr rrush pa fara ( i bardhë)

50 gr stika pishe

100 gr spinaq

Kripë dhe piper i zi

Vaj ulliri

Përgatitja:

Ngrohim vajin në tigan në nxehtësi mesatare dhe kavardisim qepën për 3-5 minuta derisa të zbutet dhe të zverdhet pak.

Shtojmë mëlçitë e pulës, kripën dhe piperin dhe i gatuajmë ato për 2-4 minuta, duke i trazuar lehtë derisa të zverdhen pak.

Gjatë kohës që gatuajmë mëlçitë kavardisim pa yndyrë stikat e pishës.

Shuajmë mëlçitë dhe qepën me verë. Shtojmë pak krem pana , rrushin e prerë në gjysmë, spinaqin dhe i lëmë të vlojë, duke shtuar në fund stikat  pishës. Rregullojmë shijen me kripë dhe e shërbejmë të ngrohtë.

D.M./b.ha./Shqiptarja.com

TAG:
• rreze dielli
• receta
• zonja vjollca
• gatime
• Bukë me vezë
• Mëlçi pule