Gra, burra e fëmijë u turrën në kantierin ku Bashkim Ulaj po ndërton resortin “Blu Borgo” në vijën bregdetare të Velipojës.

Protestuesit u konfrontuan me policinë në përpjekje për të ndalur punën e makinerive të rënda në kantier. Punëtorët u detyruan të zbresin nga mjetet dhe të ndalojnë punën për afro një orë. Protestuesit u larguan më pas, por thanë se protestat do të vazhdojnë derisa të gjejnë të drejtën e tyre mbi pronat e trashëguara ndër breza.

Ata kërkuan që prokuroria e Shkodrës të hetojë, pasi ish-zyrtari i Kadastrës, Fatmir Shpellza, në vitin 2016 ka falsifikuar disa pulla hipotekore.

“Të verifikohen pulla tona hipotekore të cilat janë të viteve 97, 96, të 95 dhe të krahasohen me ato të Fatmir Shpellës të cilat janë të vitit 2016. Nuk është emri i regjistruesit hipotekuesit… Nuk do jemi paqësorë. Do të jemi më ndryshe”, thanë banorët.

Banorët kërkojnë nga biznesmeni Bashkim Ulaj që të mos ndërtojë mbi tokat e tyre pa marrëveshje për kompensim, duke paralajmëruar se grabitja e tokave te trashëgimisë mund të çojë në përshkallëzim e tension të situatës. Ata shtuan se do të mbrojnë tokën me të gjitha mjetet.

“Unë e di se ju s’keni frikë… Mos i jep paret policëve, po na jep ne, jepja këtij popullit. Ulu këtu dhe bjer dakord me ne. Nëse bjen dakord e gëzosh”, tha banori.

Me herët dhe organizata mjedisore PPNEA deklaroi se projekti rrezikon të betonizojë një zonë të mbrojtur, ku strehon qindra shpendë shtegtarë, duna bregdetare të paprekura, laguna, habitate të rralla dhe korridore ekologjike.

Oligarku Bashkim Ulaj ka marrë statusin e investitorit strategjik nga Qeveria për të ndërtuar “Blue Borgon”, resortin turistik me 33 struktura akomodimi me nga 3 deri në 10 kate mbi tokë dhe 1 kat nëntokë.

K.B/Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

Komente

  • Sondazhi i ditës: 4 Mars, 21:56

    Mendoni se ndryshimet në Ekzekutiv do përmirësojnë qeverisjen e vendit?

Lajme të tjera