Tensionet pas dorëheqjes së serbëve në komunat veriore, Peleshi: Kosova është në të drejtën e vetë për të kërkuar reciprocitet nga Serbia

Gjatë një vizite në Korçë, ministri i Mbrojtjes, Niko Peleshi është pyetur për tensionet në veri të Kosovës. Peleshi tha se Shqipëria inkurajonte dialogun dhe se Kosova ishte në të drejtën e vetë kur kërkonte reciprocitet me Serbinë.

“Komenti im është ai i qeverisë Shqiptare. Ne inkurajojmë dialogun dhe është në gjithë të drejtën e vetë të kërkojë reciprocitet. Kosova është një vend i pavarur e i pacënueshëm padyshim, por vetëm rruga e dialogut është rruga që do të zgjidh të gjitha çështjet është parësor për të gjitha vendet tona, drejt destinacionit të vetëm që Ballkani Perëndimor ka dhe ai është integrimi në strukturat Euro-Atlantike. Ne jemi 3 nga 6 vendet që gjysmën e rrugës e kemi kryer, pra jemi anëtarë të NATO-s, por jemi ende në rrugëtimin e BE-së”-tha Peleshi.

Teksa nënvizoi se Serbia kishte agjende të ndryshme nga vendet e tjera sa i përket anëtarësimit në NATO, ministri tha se të gjithë shtetet e tjera të rajonit duhet të ndiqnin destinacionin e tyre. Ndërkohë shtoi se e vetmja mënyrë për arritje në të ardhmen ishte ulja në tavolinë Serbisë dhe Kosovës.

“Integrimi është axhendë e të 6 vendeve. Serbia ka axhendë të ndryshme nga ne përsa i përket integrimit në NATO, por të gjithë vendet e tjera rrugën drejt NATO-s e kanë destinacionin e tyre.

Pra inkurajojmë dialogun, uljen në tavolinë, teksa kemi disa vite që është një proces që po ndodh dhe jo një apel përsa i përket të ardhmes. Dhe është mirë që të gjitha arritjet të mbahen dhe të ndërtohen mbi dialogun”- u shpreh ministri.

Ndërkohë ditën e djeshme, presidentja e Kosovës, Vjosa Osmani caktoi datën 18 dhjetor për zgjedhje lokale në komunat në veri të vendit, ku zyrtarët serbë kanë dhënë dorëheqje nga postet e tyre.

B.V/Shqiptarja.com

TAG:
• Korce
• tensionet kosove-serbi
• reciprociteti i targave
• niko peleshi