Tentoi të rikthehej në Britani me argumentin se kishte fëmijë me shtetasen britanike, 30 vjeçari shqiptar dëbohet për të tretën herë

Shqiptari, Blerim Ismalaj ka dështuar për herë të tretë në përpjekjet e tij për të qëndruar në Britaninë e Madhe me argumentin se ai kishte të drejtën e jetës familjare aty duke qenë se kishte një fëmijë me një shtetase britanike.

30-vjeçari u dëbua për herë të parë nga Britania e Madhe në janar të vitit 2013. Që atëherë, ai është kthyer dy herë në Mbretërinë e Bashkuar - dhe gjatë qëndrimit të tij të fundit në vitin 2019, ai pati një fëmijë me partneren e tij britanike, shkruan Daily Mail.

Ismalaj përdori rrethanat e tij për të argumentuar rastin e tij sipas Aktit të të Drejtave të Njeriut, duke këmbëngulur se jeta e tre vjeçarit të tij do të ndikohej negativisht nëse ai do të detyrohej të largohej përsëri nga Britania e Madhe.  Por një gjyqtar i lartë i emigracionit ka lënë në fuqi vendimin për deportimin e tij drejt Shqipërisë.

Gjykatësi Gaenor Bruce, i Tribunalit të Lartë, i mbledhur në Qendrën e Drejtësisë Civile të Mançesterit, deklaroi: 'Ky apel është krejtësisht i keqkuptuar. Nuk ishte tepër e ashpër për asnjë nga fëmijët e ankuesit që ai të dëbohej. Kishte padyshim faktorë shumë të rëndësishëm, të cilat në mënyrë mjaft legjitime përfshinin faktin që ankuesi ka treguar një shpërfillje të hapur për kontrollin e imigracionit'.

Rasti vjen pasi Britania pranon një fluks shqiptarësh që mbërrijnë me varka të vogla përtej Kanalit, numri i të cilëve raportohet të ketë qenë deri në 12 mijë në këtë vit.

Sekretarja e Brendshme Priti Patel nënshkroi një marrëveshje deportimi me Shqipërinë në korrik 2021, duke lejuar Britania e Madhe të kthejë kriminelët dhe azilkërkuesit të cilëve u refuzohet kërkesa për qëndrim.  Ismalajt iu dorëzua për herë të parë një urdhër dëbimi në dhjetor 2012 në moshën 20-vjeçare, pasi u dënua për prodhimin dhe shpërndarjen e substancave narkotike.

B.V/Shqiptarja.com

TAG:
• debati per shqiptaret ne britani
• shqiptaret ne britani
• Blerim Ismalaj