Tre persona do të hetohen në gjendje të lirë pasi hipën një kalë poni në një mjet lundrues në plazhin e Velipojës

Ndaj tyre rëndon vepra penale “Keqtrajtimi i kafshës”.

Ndërkohë blutë bëjnë me dije se kanë gjobitur pronarin e mjetit lundrues 500 000 lekë të rinj.

“Në lidhje me një video të publikuar në rrjetin social “JOQ Albania”, në të cilën shfaqen disa shtetas duke vendosur një kalë (pon) në një mjet lundrues në breg të detit, në plazhin e Velipojës, informojmë se:

Menjëherë pas publikimit të videos, shërbimet e Stacionit të Policisë Velipojë, në bashkëpunim me shërbimet e Policisë Kufitare Velipojë, kryen verifikimet përkatëse dhe identifikuan 3 shtetasit që shfaqen në video.

Në vijim të veprimeve për rastin, specialistët për Hetimin e Krimeve të Komisariatit të Stacionit Velipojë referuan materialet në Prokurori, ku nisi procedimi penal në gjendje të lirë për shtetasit F. Sh., 36 vjeç, F. Xh., 61 vjeç dhe L. B., 40 vjeç, për veprën penale “Keqtrajtimi i kafshës”.

Gjithashtu, shtetasi F. Sh., pronari i mjetit lundrues, u ndëshkua nga Policia Kufitare, me masë administrative 500 000 lekë të rinj, në bazë të nenit 24, pika 1, shkronja “c”, të ligjit nr. 43/2020”, njoftoi policia.

Policia fton qytetarët që të denoncojnë në numrin pa pagesë 112, çdo rast paligjshmërie apo keqtrajtimi të kafshëve, duke garantuar reagim të menjëhershëm dhe në përputhje me ligjin.