Shqipëria pjesë e fushatës ‘Turqia, një zemër’, dhuron 1 milionë euro pas tërmetit shkatërrues! Rama: S’harrojmë çfarë bëri Erdogan për ne në vitin 2019

Shqipëria ka dhuruar 1 milionë euro si mbështetje financiare për rindërtimin në Turqi pasi u godit nga tërmeti shkatërrues 7.9 ballë më 6 shkurt që shkaktoi mbi 35 mijë viktima. Këtë e bëri me dije kryeministri Edi Rama, i cili u shpreh i nderuar që u bë pjesë e fushatës sensibilizuese televizive “Turqia, një zemër”.

Në një lidhje telefonike teksa fushata sensibilizohej transmetohej në të njëjtën kohë në 13 kanale televizive në Turqi, Rama shprehu ngushëllimet për familjet e viktimave dhe deklaroi mbështetjen për popullin turk. Po ashtu kujtoi se si presidenti turk Erdogan iu gjend pranë popullit shqiptar në vitin 2019 kur vendi ynë u godit nga tërmeti që shkaktoi 52 viktima.

“Jam shumë i nderuar të jem pjesë e këtij programi sensibilizues, si përfaqësues i Shqipërisë. Vendi ynë mbajti të hënën një ditë zie kombëtare, për të shprehur solidaritetin dhe nderuar viktimat e tragjedisë. Ne nuk do ta harrojmë çfarë bëri Presidenti Erdogan pas tërmetit të vitit 2019. Ne jemi me popullin turk. Në emër të popullit shqiptar ne duam të dhurojmë 1 milionë euro. E di që kjo nuk është asgjë, pasi nevojat janë shumë-shumë më të mëdha”, tha Rama.

LEXO EDHE:
Kryeministri spanjoll mendon dorëheqjen ndërsa bashkëshortja akuzohet për korrupsion, Rama: Mos u dorëzo, e vërteta do mbizotërojë

Gjatë fushatës “Turqia një zemër”, vetëm brenda 2 orë e gjysmë u bënë 9 milionë telefonata dhe u grumbulluan të paktën 6.1 miliardë dollarë. Presidenti turk Erdogan është zotuar të vazhdojë me përpjekjet e shpëtimit për qytetarët që kanë mbetur ende nën rrënoja ndërsa procesi i rindërtimit do të nisë në muajin mars.

Nga tërmeti shkatërrues, pati mbi 41 mijë viktima në Turqi dhe Siri ndërsa mijëra të tjerë mbetën të plagosur e të pastrehë për shkak të dëmeve që pësuan në banesat e tyre.

 

A.M./KT/Shqiptarja.com

TAG:
• shqiperi
• termet i fuqishem ne turqi
• edi rama