Theu masën e arrestit dhe doli në protestë për të hedhur sërish tritol, gjykata fut në burg Sokol Bushkolën! Një tjetër protestues në pranga

Tirane- Gjykata e Tiranës ka lënë në burg protestuesin Sokol Bushkolaj, të arrestuar pas protestës së 7 tetorit. Prokuroria kërkoi arrest në burg pasi protestuesi kishte thyer edhe masën e sigurisë arrest shtëpie, lidhur me një vendim të mëparshëm të gjykatës.

Bushkolaj akuzohet për largim nga vendi i qëndrimi, për goditje për shkak të detyrës dhe shkatërrim prone me zjarr.

49 vjeçari nga Kruja nuk është një emër i panjohur për policinë e Tiranës. Ai u arrestua pas protestës së 28 majit para Bashkisë së Tiranës pasi akuzohet si autori i  hedhjes së molotovit që rrezikoi jetën e gazetarëve dhe qytetarëve.

Ndërkohë sot u arrestua një tjetër protestues. Bëhet fjalë për një 22 vjeçar i cili akuzohet se hodhi molotovët drejt institucioneve.

Specialistët për Hetimin e Krimeve të Komisariatit të Policisë Nr. 1 ndaluan shtetasin K. B., 22 vjeç, banues në Peshkopi, për veprat penale "Goditjet për shkak të detyrës", "Shkatërrimi i pronës me zjarr", "Prishja e qetësisë publike" dhe "Shkelja e rregullave mbi lëndët plasëse dhe djegëse".

Dje u lanë në arrest shtëpie me kërkesë të prokurorisë dy protestuesit e tjerë Xhevahir Rrushi dhe Gentian Tuga.

Ndërkohë policia e Tiranës nisi hetim në gjendje të lirë për 3 organizatorë të protestës së dhunshme të 7 tetorit, Gazment Bardhin, Flamur Noknë dhe Ervin Minarollin. Në gjendje të lirë po hetohen 9 persona, përfshirë 2 fëmijë i  mitur, ndërsa 8 janë në kërkim.

Në vijën e parë të akteve të dhunës dhe hedhjes së molotovëve në drejtim të institucioneve dhe selisë së PS-së u përdorën edhe grupe të rinjsh, shumica e të cilëve të mitur.

Nga sulmi i paprecedentë me molotovë e sende të forta, u lënduan 10 efektivë të policisë, dhe 2 protestues.

S.G/Shqiptarja.com

TAG:
• protesta e opozites
• protesta e 7 tetorit
• sokol bushkolaj
• PD