Edhe pse prej vitesh me radhë opozita është përpjekur që të ankohet se Qeveria ka në kontroll mediat, një skandal i ndodhur mbrëmë në dy televizione në vend ka treguar krejtësisht të kundërtën.

Dy televizione të ndryshme kanë 'hedhur në kosh' axhendën e tyre redaksionale vetëm që t'i linin të gjithë vëmendjen një interviste që jepte në një tjetër televizion kryetari i PD-së, Lulzim Basha. 

Mbrëmë ish-kryetarja e Parlamentit e nënkryetare e PD, aktualisht pjesë e “Lëvizjes për Ndryshim”, Jozefina Topalli ishte e ftuar në emisionin e televizionit të familjes së Berishës. Por në mënyrë të papritur i është anuluar ftesa. Një fakt të tillë e bën të ditur gazetari dhe botuesi i gazetës “TemA”, Mero Baze.

Baze shton jo pa ironi se demokratët duhej të shihnin vetëm Lulin në një stacion tjetër. Njëherësh thotë se për të gjithë ata që i ka marrë malli për lirinë e shtypit të Berishës, të shohë këtë shembull me ish nënkryetaren e partisë.

“Jozefina Topalli ishte e ftuar tek TV Zeni në emisionin e Çim Pekës, por meqë demokratët duhet të shikonin vetëm Lulin, Tv Zeni ja anulloi emisionin. Kjo vlen për të gjithë ata që i ka marrë malli për lirinë e shtypit Sali Berishës. As në frëngji të kullës tij, nuk të lë të nxjerrësh kokën”, shkruan Baze në facebook.

Ndërkohë që në një tjeter televizion ka qenë mbrëmë i ftuar nënkryetari aktual i PD-së, Edi Paloka. Edhe ky i fundit, që të mos i merrte një pjesë audience Bashës, ka anuluar intervistën e tij në minutat e fundit.

Dy sjellje skandaloze që tregojnë një shfaqje të shëmtuar, e cila përveçse vërteton një kompleks inferiorite të kryetarit të PD-së Basha por edhe rrëfen qartë se sa 'respekt' ka për mediat një forcë politike e cila mendon të qeverisë vendin.