Topalli në Report TV: Pas 25 prillit, negocioj për qeverinë e re me PD-në me kryeministër jo Bashën, por një 'Mario Draghi' shqiptar! Nëse fiton PS, do bëj opozitë të fortë

Mes akuzave se Lëvizja për Ndryshim, është krijuar për të favorizuar kryeministrin Edi Rama, Jozefina Topalli thotë se partia e saj ndihmon demokratët.

"Është një punë e përditshme e Bashës, mesazhi që  ua çon struktura dhe në media,  sepse konsideron armikun kryesor Lëvizjen për Ndryshim dhe Topallin, për mua kjo është qesharake. Ne po i bëjmë nder të djathtës, se PD as bashkë me Metën nuk e rrëzojnë Ramën, dhe u duhen mandatet e një lëvizje të re", tha Topalli.

Për Jozefina Topallin, fushata elektorale është përtej njerëzores nga 2 partitë e mëdha, ku nga njëra anë, sipas saj PS po përdor vaksinat, e ndërsa PD-ja numrin e viktimave nga COVID.

"Po përdor numrin e atyre që kanë humbur jetën Rama vaksinimit, të dyja janë të drejta. Shumë mirë që kanë ardhur vaksinat, po bën detyrë, por edhe të përdorësh numrin e atyre që janë ndarë nga jeta, nuk më duket njerëzore dhe as etikë, janë të pamëshirshëm në fushatë. Tregon se deri kur arrijnë për pushtetin e tyre politik, bëhen të frikshëm, nuk kanë kufij", tha Topalli.

Pritshmëritë e Jozefina Topallit nga këto zgjedhje janë që Lëvizja për Ndryshim do të jetë një faktorë i rëndësishëm politik  në formimin e qeverisë. Megjithatë, për këtë ka një kusht, kryeminisër nuk duhet të jetë as Edi Rama, as Ilir Meta dhe as Rama. Ajo shprehet se është e gatshme që të negociojë me PD-në pas zgjedhjebe, por jo me Bashën kryeministër.

"Do sjellë shumë surpriza, për disa që mendojnë dhe skepticizëm, nuk e shoh vetëm të Shkodra dhe Tiranë. Unë besoj se nuk do më gaboj nuhatja politike, e di që vendimi që kemi marrë është një vendim i vështirë. Por kur ke vullnetin dhe përkushtimin dhe ia del. Në Dibër janë disa kandidatura, po flas për numrin e parë të listës, ajo është një politikane e lindur përballë Xhelal Mziut, dibranët janë të mençur. Besoj se do të marrim aq mandate se të bëhemi faktor. Mendoj që asnjëra prej palëve nuk mund të qeverisë e vetme, ne mund të jemi një faktor dhe pastaj i mbetet negociatat dhe më pas negociatat do të ishin me të djathtën, se ne jemi një lëvizje e djathtë dhe unë jam e djathtë. Nuk përfytyrojë që të bëhet negociata për emra, ne negociojmë për të pasur një kryeministër të pakorruptuar për të krijuar një model të ri zgjedhjes. Nuk ka pse të jetë o Lulzim Basha, o Edi Rama apo Kryemadhi apo Meta, por nuk është kjo politika. Me Ramën kryeministër jo. Nuk negocioj. As Rama, as Basha, as Ilir Meta. Ne mund të gjejmë Mario Draghi tonë shqiptar, i pakorruptueshëm. Prioritet kam një negociatë me PD-së për një Draghi shqiptar. Nëse fiton PS, do jem në opozitë të fortë kundër Edi Ramën dhe atyre që e mbajnë në pushtet", tha Topalli.

Për kryetaren e Lëvizjes për Ndryshim, Jozefina Topalli, 3 kryetarët e partive më të mëdha në vend, përfshirë këtu edhe presidentin Ilir Meta, druhen nga marrëveshjet e fshehta me njëri-tjetrin.

"3 kryetarët dyshojnë për njëri-tjetrin. Rama dyshon që Lulzim Basha me të cilin ka bërë një marrëveshje, do që të ketë thyerje mes Bashës dhe Metës, meta dyshon që Basha do të hyjë në qeveri me Ramën. Po ndodh ajo që Rama ka thënë se kjo është një lojë shahu", tha Topalli.