Topalli: Rama kërkon gjethen
e fikut, po e turpëron përditë

TIRANË – Kryetarja e Parlamentit, Jozefina Topalli në një dalje të posacme për median ka reaguar pas akuzave të socialistëve se po mban peng mandatin e një deputeti. Kryeparlamentarja e cilësoi si të paprecedentë marrëdhënien e Rudina Seserit me Kuvendin.
“Rama po fshihet në kuti, cadër apo kafaz. Por, më parë ai duhet tu tregojë shqiptarëve se kush e solli Seserin në kuvend, pse ajo nuk erdhi as tre ditë. Seseri është rasti i degradimit të partisë së miliarderëve me kryetar fukara”, tha Topalli.
Më tej ajo ka sqaruar se as Kushtetuta dhe as rregullorja e Kuvendit nuk i atribuojnë asaj zëvendësimin e një deputeti në Kuvend.
“Askush vec Ramës nuk ka vënë në pikëpytje faktin se në vend të Seserit do ulet një Seser tjetër. PS ka ndërruar mendje 30 herë në Këshillin e Rregullores. Rama tu thotë shqiptarëve, se në cilin nen të Kushtetutës autorizohet kryetari i Kuvendit për të hequr apo dhënë mandatin e Kuvendit”, deklaroi kryeparlamentarja.

Më tej ajo ka akuzuar sërish presidentin Topi se është rreshtuar në krah të opozitës.
“Rama të sjellë kandidaturat për vendet vakante në TVSH apo KKRRT të cilat për 3 vjet janë lënë bosh njësoj si karrigia e zonjës Seseri. Sa për akuzat për bllokim, ai le t’i çojë në sirtarin e presidencës. Po unë aty nuk e ndihmoj dot. Aty do kërkojë një votues të tij të devotshëm”, tha Topalli, sipas së cilës kryesocialisti po kërkon një gjethe fiku, e cila në vend ta mbrojë, po e turpëron më shumë atë.

(aq/Shqiptarja.com/Redaksia-Online)