Ikona e klubit të Romës në Serie A, Francesco Totti, mund të rikthehet sërish në një post drejtues në skuadrën që i kushtoi gjithë karrierën. Ka qenë ish-trajneri Claudio Ranieri, tanimë këshilltar i presidentit, i cili ndezi shpresat për një rikthim të 'Perandorit'.

"E di që familja Friedkins po e mendon. Shpresoj që Francesco të jetë vërtet i dobishëm për Romën, veçanërisht sepse ai është vërtet pjesë e Romës", tha konsulenti i pronarit për Sky.

Palët thuhet se kanë qenë në kontakt prej disa kohësh. Një fazë studimi është duke u zhvilluar aktualisht, pasi ata po kuptojnë se çfarë roli dhe kompetencash mund t'i ofrohen Tottit. Ky është një hap i rëndësishëm, duke pasur parasysh se përvoja e mëparshme e Tottit në menaxhimin e klubit rezultoi jo e mirë.

Pasi u tërhoq nga futbolli i luajtur në maj 2017, Totti menjëherë mori një rol në menaxhimin e verdhekuqve, fillimisht, pozicioni i tij ishte ai i asistentit të departamentit teknik. Ky vendim buroi nga dëshira e klubit, atëherë nën pronësinë e James Pallottas, për ta mbajtur ish-kapitenin brenda klubit si një figurë simbolike dhe mbështetëse.

Megjithatë, që në fillim, roli dukej i papërcaktuar. Vetë Totti pranoi disa herë se i mungonin fuqitë e vërteta vendimmarrëse dhe shpesh ndihej i mënjanuar në proceset kyçe.

Në vitin 2018, ai u ngrit në detyrë si drejtor, me qëllim që të punonte përkrah drejtorit sportiv Monchi. Edhe pse këtë herë roli ishte më i qartë, ndikimi i tij në vendimmarrje mbeti i kufizuar. Strategjitë e transferimeve u ndikuan fuqishëm nga Monchi dhe pronarët amerikanë, teksa Totti filloi të shprehte zhgënjim për mungesën e vëmendjes.

Barra e të qenit "Totti" te Roma dhe pamundësia për të ndikuar në vendime siç do të donte, e detyruan Francescon t'i thoshte lamtumirë klubit që donte. Në qershor 2019, ish-kapiteni dha dorëheqjen, duke shpjeguar publikisht se nuk mund të punonte më në një kontekst ku i mungonte autonomia, nuk ndante vendime strategjike dhe nuk ndihej i respektuar në rolin e tij. Sot, me një pronësi të re dhe një rol më të qartë, Totti mund të kthehet në shtëpi.