Një avion mallrash i Amazon doli nga pista të dielën pasdite në aeroportin e Miamit, një nga aeroportet më të ngarkuara në Shtetet e Bashkuara. Avioni nuk u ndal brenda perimetrit të aeroportit, por vazhdoi lëvizjen, duke çarë rrethimin, duke përplasur disa automjete që në atë moment po qarkullonin në një rrugë dhe duke marrë flakë. Avioni ishte një Boeing 767 i kompanisë 21 Air, i cili kryen fluturime transporti mallrash për Amazon.

Bilanci, ende paraprak, i bërë të ditur nga policia lokale është të paktën 5 të vdekur dhe disa të plagosur. Komunikimet radio mes ekipeve të shpëtimit flasin për 5 të vdekur, 3 të plagosur rëndë dhe 2 jashtë rrezikut. Megjithatë, bëhet fjalë për informacione paraprake, ndaj ato mund të ndryshojnë gjatë orëve të ardhshme.

Administrata Federale e Aviacionit, duke konfirmuar incidentin, deklaroi se avioni e kapërceu fundin e pistës në orën 13:53 sipas kohës lokale (19:53), pasi kishte mbërritur nga San Juan, Porto Riko.

Zyrtarët e shërbimit zjarrfikës të Miami-Dade raportuan se avioni goditi disa automjete pasi doli nga pista. Sipas Flightradar24, në matjen e fundit të regjistruar, në fund të pistës, Boeing 767 po lëvizte me një shpejtësi prej 207 kilometrash në orë.

Gjatë operacionit për shuarjen e zjarrit, zjarrfikësit u përballën edhe me situatën e motorit numër 1 të avionit, atij në anën e majtë, i cili ishte ende në punë. Kjo e bënte të rrezikshëm jo vetëm hipjen në bord për të ndihmuar personat që ndodheshin brenda, por edhe afrimin pranë avionit, për të shmangur rrezikun e thithjes nga motori.

Në atë moment, zjarrfikësit u detyruan ta mbulonin motorin me ujë në mënyrë që ta çaktivizonin.

Vetëm pak metra më tutje, zjarrfikës të tjerë dhe ekipet e shpëtimit nxorrën të plagosurit rëndë, të cilët kishin mbetur të bllokuar në automjetet e goditura nga avioni.

Të gjitha pistat dhe rrugët e aeroportit të Miamit janë mbyllur, bëri të ditur një zëdhënës i kompanisë që menaxhon aeroportin. National Transportation Safety Board (NTSB), agjencia federale amerikane që heton incidentet në fushën e transportit, deklaroi vetëm se po “mbledh informacion” mbi ngjarjen.

“Po bashkëpunojmë ngushtë me autoritetet lokale dhe zyrtarët për të kuptuar saktësisht se çfarë ka ndodhur”, komentoi një zëdhënëse e Amazon. “Në këtë moment, përparësia jonë absolute është siguria, mirëqenia dhe ofrimi i ndihmës për të gjithë personat e përfshirë.”/Corriere