Gjyqi për tragjedinë më të madhe hekurudhore në Greqi që shkaktoi vdekjen e 57 personave në Tempi në 2023, ka nisur. Mes viktimave ishte edhe 22-vjeçari shqiptar, Denis Ruçi.

36 persona përballen me akuza, dhe më shumë se 350 dëshmitarë pritet të dëgjohen në gjyqin që u hap në qytetin qendror të Larisës, pranë vendit ku një tren mallrash dhe një tren pasagjerësh u përplasën më 28 shkurt 2023.

Mes dëshmitarëve janë të mbijetuar dhe anëtarë të familjeve të viktimave, disa prej të cilëve besohet se u dogjën pasi i mbijetuan përplasjes fillestare. Shumica e të vdekurve ishin studentë që po ktheheshin nga një fundjavë karnavalesh.

Para hapjes së gjyqit, Pavlos Aslanidis, i cili humbi të birin 26-vjeçar, Dimitris  dhe që udhëheq Shoqatën e Familjeve të Viktimave, tha për gazetarët: “Ky gjyq po fillon me vonesë të madhe… ajo që duam është ndëshkim shembullor për ata që janë përgjegjës.”

Të akuzuarit përfshijnë menaxherin e stacionit që ishte në detyrë natën e aksidentit, zyrtarë të tjerë hekurudhorë dhe dy ish-punonjës italianë të kompanisë nëntokësore të trenave, Ferrovie dello Stato.

Ata akuzohen për kryerjen e “veprimeve që rrezikojnë sigurinë e trafikut hekurudhor duke rezultuar në vdekjen e një numri të madh personash dhe dëmtime serioze trupore për një numër të madh personash”, sipas aktakuzës që ka parë Agence France-Presse.

Të dy trenat kishin lëvizur në të njëjtin shteg për më shumë se 10 minuta pa aktivizuar ndonjë alarm. Katastrofa ekspozoi gjendjen e rëndë të sistemeve të sigurisë të rrjetit hekurudhor grek, pavarësisht fondeve të BE-së për modernizimin e tyre dhe paralajmërimeve të përsëritura nga sindikatat.

Gjyqi pritet të zgjasë disa vite. 33 nga të akuzuarit përballen me akuza penale dhe rrezikojnë edhe burgim të përjetshëm. Asnjë nga të akuzuarit nuk ndodhet në burg, megjithëse disa kanë shërbyer kohë në paraburgim para gjyqit.

Kreu i Zyrës Europiane të Prokurorit Publik, Laura Kövesi, tha se përplasja mund të ishte shmangur nëse sistemi i sinjalizimit do të ishte modernizuar me kohë duke përdorur fondet e BE-së.

Punonjësit e trenave po zhvillojnë një grevë 24-orëshe në atë që sindikata e tyre e ka quajtur “një akt përkujtimi kolektiv, proteste dhe vigjilencë demokratike”.

Për shkak të numrit të pjesëmarrësve, gjyqi u zhvendos në një sallë leksionesh në Universitetin e Tesalisë në Larisa.

Katastrofa shkaktoi zemërim të gjerë në vend, i cili nuk është zbutur kurrë. Dhjetëra mijëra persona morën pjesë në protesta në gjithë vendin për të shënuar përvjetorin e tretë të aksidentit muajin e kaluar.

Asnjë zyrtar politik nuk do të jetë në bankën e të akuzuarve, duke ushqyer pakënaqësi në një kohë kur qeveria konservatore e kryeministrit grek, Kyriakos Mitsotakis, është kritikuar ashpër për mënyrën që u menaxhua kjo katastrofë.

Ekzistojnë gjithashtu pretendime nga opozita dhe shoqëria civile se zyrtarët po mbrojnë përgjegjësit. Dy ish-anëtarë të qeverisë janë nën hetim, por asnjëri nuk është paraqitur në gjykatë. Dëshmi të vlefshme u humbën gjithashtu kur, pak ditë pas përplasjes, një buldozer niveloi vendin e aksidentit.