'I iku nga sytë për 10 minuta' Nëna e 7 vjeçarit shqiptar që u mbyt në Kretë po kujdesej për djalin e vogël në shtëpi! Policia e ndalon më pas e liroi

Mbytja e Nikolas, 7 vjeçarit me origjinë shqiptare të shtunën e 1 qershorit në Kretë ka pikëlluar komunitetin e banorëve atje.

I vogli kishte shkuar në det të lahej me një shok kur duket që është rrëmbyer nga dallgët dhe nuk ia ka dalë.

Trupi i të voglit u pa nga kalimtarë, e megjithë përpjekjet për ti dhënë ndihmën e parë për ta shpëtuar Nikolas u vogël nuk ia doli.

Nëna e tij kishte vetëm pak muaj që kishte lindur fëmijën e dytë dhe ndodhej në shtëpi duke u kujdesur për foshnjen kur ndodhi tragjedia. Ndërsa i ati kishte qenë në punë kur mësoi lajmin tragjik.

Tragjedia ka ndodhur brenda 10 minutave. Nëna e djalit ka dëshmuar në komisariatin e Viannos se ishte në shtëpi me 7-vjeçarin dhe foshnjën e familjes kur papritur i kishte humbur nga sytë. 

Kishte dalë ta kërkonte por për 10 minuta tragjedia kishte ndodhur! Fëmija, i cili ishte në klasë të parë, ishte larguar nga banesa disa metra larg plazhit dhe kishte shkuar në det.

Gruaja u ndalua fillimisht për shkelje të nenit 302 të Kodit Penal. (Vrasje nga pakujdesia) por më pas është liruar me urdhër të prokurorit publik.

Prindërit e Nikolas ishin njerëz të thjeshtë që punonin gjithë ditën për t'u ofruar më të mirën fëmijëve të tyre.  Në polici është marrë dëshmia e prindërve, ndërsa kryebashkiaku Viannos, Pavlos Baritakis, pranoi se plazhi nuk kishte roje shpëtimi, shkruan media greke protothema. 

Familja kërkon që Nikola i vogël të varroset në vendlindjen e tij në Shqipëri, megjithatë shpenzimet e transportit janë të larta dhe për këtë arsye banorët po përpiqen të mbledhin para në rast se varrimi vendoset të bëhet në Shqipëri.

Megjithatë vendimi do të merret pas të martës pasi autopsia do të bëhet të hënën dhe trupi i fëmijës së vogël do të mund ti dorëzohet familjes.

SI.E./S.G/Shqiptarja.com

TAG:
• greqi
• mbytet ne det
• krete