Trazira në Britaninë e Madhe, e djathta ekstreme sulmon Sunderlandin pas vrasjes së 3 vajzave! Starmer: Ekstremistët dhe huliganët do i mposhtim (Video)

Angli- Racistët dhe vandalët sulmuan policinë dhe plaçkitën dyqanet në veri të Anglisë, pas masakrës së vajzave të vogla në Southport. Tridhjetë "demonstrata" të tjera janë të planifikuara për fundjavën, teksa kryeministri Starmer ka reaguar fortë, duke u shprehur se "do t'i mposhtim huliganët!"

E djathta ekstreme dhe huliganë shkaktuan trazirat mbrëmjen e së premtes (2 gusht), duke sulmuar policinë në mbrojtje të një xhamie lokale, e duke i vënë zjarrin një stacioni policie, dy makinave, si dhe duke plaçkitur disa dyqane. Nuk munguan as goditjet me gurë, kanaçe birre dhe madje edhe mjete të tjera ndaj oficerëve, raporton “La Repubblica”.

Por një gjë është e sigurt për mediat britanike: Ekziston rreziku i një “vere trazirash”, siç i trembet edhe qeveria e Starmer.

“Këta janë kriminelë, racistë dhe huliganë, shpesh të dehur pas dhjetëra kanaçeve birre të cilat i tregojnë në çdo "demonstratë", të cilët lavdërojnë ekstremistin ksenofob të djathtë dhe teoricienin e konspiracionit Tommy Robinson dhe janë të njëjtët huliganë që u infiltruan në demonstrata për dhe kundër Brexit”, ishin reagimet e autoriteteve shtetërore. Teksa një video u bë virale, e njërit prej vandalëve të Sunderland, me një tatuazh svastika (kryqi nazist) në shpinë.

“Pra po përgatitemi për një fundjavë dhune dhe tensioni. Ka rreth tridhjetë demonstrata të ekstremit të djathtë dhe huligan të planifikuar në të gjithë vendin nga sot dhe nesër, nga Londra në Newcastle në Belfast”, thanë burimet.

Frika e policisë është se, siç ndodhi me "trazirat" e vitit 2011 në Angli, ekziston një efekt imitues "kopjues" midis fraksioneve ekstremiste të vendit për të çliruar çrregullime dhe shkatërrime, pasi lajmet e rreme dhe dezinformatat kishin shkaktuar zemërimin e ultranacionalistëve dhe ksenofobët që kishin plagosur dhjetëra oficerë në Southport në mbrojtje të xhamisë lokale, dhe më pas plaçkitën dyqanet në zonë. Dhe për ta komplikuar situatën e rendit publik për autoritetet vendore, në orët e ardhshme raportohet se priten edhe kundër-demonstrata nga antifashistët në të gjithë vendin.

Kurse skuadra shumë e vendasve, Sunderland AFC, shkroi në X: “Skenat e turpshme që po shohim sonte nuk përfaqësojnë kulturën tonë, historinë tonë, popullin tonë. Qyteti ynë i madh bazohet në bashkëjetesën dhe tolerancën. Sunderland do të jetë gjithmonë një qytet për të gjithë. Të bashkuar jemi më të fortë. Tani. Përpara. Gjithmonë".

Kurse mëngjesin e sotëm në Sunderland, e shoqëruar edhe me pamje nga mediat vendase, dhjetëra qytetarë vullnetarë pastruan rrugët e qytetit pas përplasjeve dhe dhunës së mbrëmshme. Siç shkroi At Marc Lyden-Smith, një prift katolik lokal dhe "kumbar" i vetë ekipit të futbollit Sunderland: "Tani, ky është qyteti ynë. Komuniteti bashkohet për të riparuar dëmet e shkaktuara nga banditë dhe fanatikë që nuk kanë respekt për vlerat britanike”.

Kryeministri britanik Sir Keir Starmer premtoi një grusht të hekurt:

"Këto nuk janë demonstrata, ato nuk janë protesta legjitime: Këta janë ekstremistë të krahut të djathtë që duan vetëm të përhapin frikë, dhunë dhe tension në Mbretëri!"

Udhëheqësi Laburist njoftoi një task-forcë specifike kundër huliganëve, duke përdorur gjithashtu njohjen e fytyrës dhe parandalimin e sulmeve si ato të ditëve të fundit:

“Nuk do t'i lëmë më as të hipin në trena. Ne do t'i mposhtim ata si huliganë”. Starmer e ka nxjerrë edhe në rrjetet sociale, të cilat “nuk po bëjnë mjaftueshëm kundër postimeve dhe mesazheve që duan vetëm të përçajnë vendin”.

 

A.Q/Shqiptarja.com

TAG:
• vrasja e tre vajzave
• Britani e Madhe
• sunderland
• trazirat