Trazirat në Shkodër, Meta: Opozita të jetë e qetë, besoj që Rama do të reflektojë deri të shtunën

Presidenti Ilir Meta ka postuar në faqen e tij në Facebook një foto me kreun e PDIU-së nga takimi që pati sot për konsultimin për datën e re të zgjedhjeve që vendosi, 13 Tetorin. E ndërsa në Shkodër u sulmua një tjetër shkollë nga militantët e PD-së, brenda së cilës është vendosur një KZAZ, Meta i kërkon opozitës që të jetë e qetë dhe të mos provokohet. Presidenti thotë se ka besim se Rama do të reflektojë deri të shtunën.

"Në vijim të konsultave me partitë politike, për caktimin e 13 tetorit 2019 si datë të zgjedhjeve vendore dhe zgjidhjen e krizës aktuale, prita sot në takim kryetarin e PDIU, z. Shpëtim Idrizi. Kushtetuta e Republikës së Shqipërisë i jep ekskluzivisht të drejtën për të caktuar datën e zgjedhjeve, vetëm Presidentit të Republikës. Ndaj e ftoj opozitën të jetë më e qetë dhe të mos provokohet nga askush që kërkon trazira në Shqipëri dhe në Ballkan. Si studentë të Dhjetorit ’90, së bashku me z.Idrizi shprehëm besimin se Kryeministri Rama do të reflektojë deri të shtunën" deklaron Meta.

Por, Rama shprehet i vendosur për zhvillimin e zgjedhjeve ditën e diel, ndërsa shumica ka mbështetjen e SHBA-së dhe BE-së, të cilat njohin 30 Qershorin si datë zgjedhjesh, pavarësisht dekreteve të Metës.

TAG:
• edi rama
• Ilir Meta
• zgjedhjet lokale 2019
• 13 tetori data e re e zgjedhjeve
• Sulmohen KZAZ-të