Tritoli në makinën e prokurorit Muça, Meta: Akt kriminal! Të garantohet mbrojtja e posaçme për të dhe familjen e tij

Presidenti i Shqipërisë, Ilir Meta ka dënuar vendosjen e tritolit në makinën e prokurorit, Arjan Muça në Tiranë. Meta thotë se ky është një akt kriminal dhe institucionet duhet t’i garantojnë Muçës dhe familjes së tij mbrojtje të posaçme. Po ashtu ai thotë se menjëherë duhet të zbardhet ngjarja dhe të identifikohen autorët.

"Dënoj me forcë aktin kriminal ndaj funksionarit të sistemit të drejtësisë, Prokurorit Arjan Muça. Duke mbështetur plotësisht vendimmarrjen e Këshillit të Lartë të Prokurorisë për sigurinë e tij, u kërkoj institucioneve të ngarkuara nga ligji të garantojnë mbrojtjen e posaçme për Prokurorin Muça dhe familjen e tij. Organi i akuzës dhe të gjithë agjencitë ligjzbatuese e të sigurisë duhet të angazhohen maksimalisht për të zbardhur sa më parë ngjarjen dhe identifikuar autorët. Çdo sulm apo intimidim ndaj funksionarëve të Drejtësisë duhet të marrë ndëshkimin më të ashpër ligjor", thotë Meta.

Ngjarja e rëndë ndodhi pak dy ditë me parë, ku në zonën e Komunës së Parisit në Tiranë, i vendosën tritol makinë së Arjan Muçës, mjet i cili përdorej edhe nga bashkëshortja e tij gjyqtare, Gentina Muça.

Pas ngjarjes policia ka marrë në mbrojtje prokurorin Muça si dhe bashkëshorten e tij. Ka qenë vetë prokurori Muça, i cili është edhe këshilltar pranë KLP-së, ka kërkuar mbrojtje të posaçme. Muça i ka drejtuar një kërkesë Komisionit të Posaçëm të mbrojtjes së prokurorëve në KLP ku thotë se ndihet i kërcënuar për vete dhe familjen. 

TAG:
• Ilir Meta
• vetingu
• KLP
• Arjan Muça
• Gentjana Muça