Turizmi, Shqipëria ime fantastike
…ndalesa e radhës, Velipoja!

Velipoja, është një tjetër destinacion turistik në Shqipëri gjatë verës, që po bën përpjekje të admirueshme për të tërhequr turistë nga vendi dhe bota. Sezoni veror i këtij viti nisi zyrtarisht të shtunën e kaluar, ku nëpërmjet një ceremonie mbresëlënëse u prezantua oferta që Velipoja bën për pushuesit e saj.



Agjencia Kombetare e Turizmit mori pjesë me stendën e saj ku dha edhe mbështetjen e nevojshme llogjistike. AKT-ja në këtë aktivitet përmes një ekspozite fotografike, shfaqi pamjet më të bukura të Velipojës, gjithashtu, për pjesëmarrësit u shpërndanë falas broshura, harta dhe kataloge lidhur me turizmin shqiptar.



Nga ana tjetër, Agjencia Kombetare e Turizmit i bëri thirrje turistëve nëpërmjet një mesazhi televiziv, që ta vizitojnë sivjet Velipojën, e cila ka kryer mjaft investime në infrastrukturë dhe shërbime.
 
Por pse duhet zgjedhur Velipoja, vendi i pushimeve tuaja???
 
E ndodhur 35 km larg qytetit të Shkodrës, apo rreth 120 km nga Tirana, Velipoja është një qytezë e vogël bregdetare në veriperëndim të Shqipërisë. Ndodhet në grykëderdhjen e lumit Buna (të vetmit lumë të lundrueshëm në Shqipëri), aty ku ai derdhet në Detin Adriatik në afërsi të kufirit me Malin e Zi.


Velipoja ka rreth 8 km vijë bregdetare që përfshin edhe Ishullin Franc Josef, i cili vazhdimisht ndryshon formë. Në këtë zonë ka një klimë të butë, ku stina e verës është mjaft e nxehtë (temparatura mesatare e Korrikut, 24 gradë celsius deri në 48 gradë celsius, maksimumi në periudhën Korrik – Gusht).



Me një popullsi prej rreth 10.000 banorësh,  e shpërndarë në disa vendbanime të vogla, me qendrën më të madhe Velipojën, ata mirëpresin cdo sezon veror mijëra pushues anembanë trevave shqipëtare. Sigurisht rëra e jodizuar e ka bërë të famshëm plazhin e Velipojës për cilësitë e saj kuruese megjithatë Velipoja ka më tepër arsye për ta zgjedhur si destinacionin tuaj veror.



Adhuruesit e natyrës do të mrekullohen me gërshëtimin harmonik që do të gjejnë në këtë vend. Deti, lumi, plazhi, laguna, pylli e mali janë gjithçka që perëndia mund ti ofronte kësaj pjese të bekuar toke, padyshim mund të cilësohet një perlë e vërtetë e natyrës.

Në ujrat e rrjedhshëm të Bunës të apasionuarit pas peshkimit mund të peshkojnë lloje të ndryshme peshqish të ujrave të ëmbla si : troftë, krap, etjer. Dhe sikur të mos mjaftonin të gjitha këto, çmimet konkuruese dhe akomodimi me standarte normale.



Çmimet e hoteleve, kabinave apo dhomave ku mund të akomodoheni janë të ndryshme dhe variojnë sipas kushteve që afrojnë. Vitet e fundit Velipoja ka rritur potencialin e saj turistik, duke tërhequr jo vetëm pushues nga veriu i Shqipërisë që e zgjedhin këtë plazh për shkak të distancës së afërt por edhe pushues nga Kosova dhe Maqedonia.



Ata që interesohen konkretisht për të vizituar këtë zonë ju rekomandojmë të kontrolloni  online në internet në faqen www.velipojaguide.com ku mund të gjeni ofertën e duhur dhe  mbi të gjitha të informoheni rreth aktiviteteve të ndryshme që Velipoja rezervon gjatë  sezonit veror.



Redaksia Online
(Shqiptarja.com)