Të gatuajmë me Zonjën Vjollca/ Brokoli e lulelakër në furrë dhe Mëlçi pule me kërpudha

Përbërësit:

500 gr brokoli

500 gr lulelakër

3 të verdha veze

100 gr djath i bardhë

100 gr kaçkavall i butë

1 gotë qumësht

30 gr gjalp

Kripë dhe piper i zi

Përgatitja :

Fillimisht vendosim një tenxhere me ujë për të valuar. Ndajmë luleklakrën dhe brokolin në lule dhe i shpëlajmë mirë me ujë të bollshëm.

Shtojmë kripën në tenxhere dhe vendosim fillimisht lulelakrën të ziejë 3 minuta. Më pas shtojmë brokolin dhe i lëmë së bashku të ziejnë edhe për 3 minuta të tjera. I largojmë më pas perimet, i kullojmë dhe i vendosim në një tavë të lyer mirë me gjalp.

Ndërkohë në një tas rrahim 3 të verdha veze me  djathin e bardhë të thërrmuar, djathin kaçkavall të grirë në rende, qumësht, kripë dhe piper të zi.

Të gjithë përbërësit e përzier në tas i hedhim mbi lulelakrën dhe brokolin duke i spërkatur në të gjithë sipërfaqen. Vendosim disa thërrime gjalp mbi të dhe vendosim tavën në furrën e paragraduar në temperaturën 180ºC  për 20-25 minuta derisa të zëjë një cipë të kuqerremtë. Në fund e shërbejmë duke e përzier me pak vaj ulliri.

Receta e dytë: Mëlçi pule me kërpudha

Përbërësit:

500 gr mëlçi pule

300 gr kërpudha

2 qepë mesatare

2 thelpinj hudhër

1/2 karrotë

1 spec i kuq

1 lugë çaji miell

1 lugë çaji piper i kuq

50 ml pure domate

50 gr krem kosi

1 gotë lëng pule

Kripë dhe piper i zi

Përgatitja :

Në një tenxhere kaurdisim fillimisht mëlçitë deri sa të skuqen pak dhe i largojmë nga tenxherja . Në po atë yndyrë shtojmë qepën dhe e kaurdisim deri sa të zverdhet pak. Shtojmë në të hudhrën e grirë hollë, karrotën , specin e kuq të prerë në shirita dhe i kaurdisim të gjitha së bashku. Shtojmë më pas 1 lugë çaji miell, dhe vazhdojmë kaurdisjen.

Ndërkohë që kryejmë këto veprime në tenxhere, në një tigan tjetër me pak vaj ulliri kaurdisim kërpudhat.

Shtojmë në tenxhere kërpudhat bashkë me mëlçitë, purenë e domates, lëngun e pulës ose ujë dhe i lëmë të ziejnë për 10-15 minuta duke rregulluar dhe shijen me kripë dhe piper. Në fund shtojmë pak krem kosi në çdo pjatë që do të shërbejmë.

//Shqiptarja.com

TAG:
• rreze dielli
• mëlçi
• brokoli
• receta
• zonja vjollca