Të gatuajmë me Zonjën Vjollca/ Byrek i shpejtë me qepë të njoma dhe Akullore me lajthi në kushtet e shtëpisë

Receta e parë : Byrek i shpejtë me qepë të njoma

Përbërësit :

1 pako peta

1 kg qepë të njoma

3 kokrra vezë dhe 1 e verdhë veze

100 ml vaj

200 gr krem kosi

350 gr gjizë pa kripë

150 ml ujë i gazuar

1 pako pluhur pjekës

1 tufë kopër

1 tufë majdanoz

Kripë

Përgatitja : 

Fillimisht pastrojmë qepët, i lajmë ato dhe i presim në unaza me trashësi 0,5 cm. I vendosim në tigan  pa yndyrë, me 1 filxhan kafeje ujë. I mbulojmë me kapak dhe i lëmë të ziejnë deri sa uji të avullojë dhe niveli i tyre të bjerë. Shtojmë 2 lugë gjelle vaj ulliri dhe i kaurdisim për 3 – 4 minuta. (I lëmë mënjanë të ftohen).

Në një tas të madh vendosim 3 vezët e plota dhe të bardhën e vezës që do ti ruajmë vecc të verdhën. Shtojmë 100 ml vaj dhe i rrahim së bashku me kremin e kosit, gjizën, ujin e gazuar, pluhurin pjekës, kripën, qepët e gatuara, koprën e majdanozin.

Lyejmë një tepsi pak të thellë me yndyrë. Vendosim 2 peta poshtë, i spërkatim pak me yndyrë lehtë dhe shtojmë 2 peta të tjera duke i bashkuar në mes dhe duke i nxjerrë shumë në anësore.

Shpërndajmë 3 – 4 garuzhde nga mbushja dhe e nivelojmë mirë. Lëmë mënjanë i petë dhe petët e tjera i copëtojmë tek e tek në copëza sa gjysma e pëllëmbës së dorës.

Petët e copëtuara i vendosim në tasin me gjizë dhe qepë , i trazojmë dhe i shtojmë në tepsi si dhe i nivelojmë mirë në të gjithë sipërfaqen.

Mbulojmë petët e copëtuara në tepsi me një petë të palosur më dysh. Kthejmë anët që i kemi lënë qëllimisht të bollshme duke i lyer me të verdhën e vezës, trazuar me 3 – 4 lugë krem kosi. Vendosim tepsinë në furrë në temperaturën 200ºC për  35-40 minuta.

Receta e dytë :Akullore me lajthi në kushtet e shtëpisë

Përbërësit :

300 gr qumësht i kondensuar

200 gr nutella

500 ml pana ëmbëlsirë

100 gr lajthi

50 gr sheqer ( alternative)

Përgatitja : 

Vendosim qumështin e kondensuar në një tas. Shtojmë në të lugë lugë kremin nutella duke e përzier gradualisht deri sa të formohet një krem homogjen. Panën e ftohtë e vendosim në një tas dhe e rrahimme rrahëse elektrike, por jo plotësisht, aq sa nëse lëvizim tasin ajo të jetë e lëngshme dhe jo e fortë si marengë. Lugë lugë, shtojmë panën tek qumështi nutella dhe e trazojmë vazhdimisht me lugë (jo me rrahës elektrik) deri sa të na formohet një masë homogjene .

E vendosim në një kuti dhe e vëmë në frigorifer ( në ngrirje ) për 10 – 12 orë.

Ndërkohë karamelizojmë sheqerin me lajthi të copëtuara dhe i vendosim në një letër pjekje. E vendosim në frigorifer deri sa të ftohet dhe të bëhet karamel. I copëtojmë copët dhe i vendosim në grirësin e qepës dhe i kthejmë në copëza të vogla. Këto mund ti hidhni në fund brenda në akullore ose i hedhim sipër akullore kur ta shërbejmë . Por mund të pudrosim dhe thjesht me lajthi të grira , të pjekura.

//Shqiptarja.com

TAG:
• rreze dielli
• receta
• zonja vjollca
• byrek
• akullore