POP 5

Lajmet më të lexuara të 5 minutave të fundit

Receta

Të gatuajmë me zonjën Vjollca/ Tavë me pllaqi dhe Rizoto me limon

Në këtë hapësirë të faqes tonë do të gjeni mënyrën e përgatitjes së recetave  të gatimit të ideuara nga Zonja Vjollca. Këto receta Zonja Vjollca i gatuan çdo ditë në emisionin Rreze Dielli nga ora 08 : 45 – 10 : 00

Receta e parë : Tavë me pllaqi

Përbërësit:

400 gr fasule pllaqi

2 kokrra qepë

400 gr pure domate

1 lugë çaji piper i kuq

2 karrota

6 thelpinj hudhër

Kripë dhe piper i zi

1 majë luge sheqer

Rigon

Nenexhik

Majdanoz

Vaj ulliri

Përgatitja:

Fillimisht pasi t’i kemi larë mirë fasulet i vendosim në ujë për gjithë natën. I shpëlajme përsëri dhe i vendosim për të zjerë. Pasi të jenë zjerë jo shumë të buta i kullojmë dhe i lemë mënjëanë.

Në një tigan me vaj ulliri skuqim qepën të prerë në kubikë, shtojmë në të karrotat të prera në feta dhe i kaurdisim së bashku duke shtuar hudhrat dhe domaten pure. E lemë gatimin të marrë një valë për 5 minuta, e rregullojmë më pas shijen me kripë, piper të zi, piper të kuq, pak piper djegës nëse e dëshirojmë gatimin pikant, nenexhik dhe rigon. Shtojmë dhe fasulet pllaqi 1 ½ filxhan uje ose lëng mishi dhe e vendosim tavën me pllaqi në furrë në temperaturën 180 gradë Celsius për 20-25 minuta. Në fund mund të shtojmë dhe pak majdanoz sipas dëshirës ose erëza të tjera sipas preferencës.

Receta e dytë : Rizoto me limon

Përbërësit:

240 gr oriz

1-2 kokrra limon

½ gotë verë e bardhë

1 qepë e vogël

Lëng perimesh

1 tufë majdanoz

Vaj ulliri

Kripë dhe piper i zi

Lëngu i perimeve:

1 qepë

1 karrotë

1 domate

100 gr rrënjë selinoje

Përgatitja:

Fillimisht në një tenxhere me ujë vendosim perimet për lëngun e perimeve dhe i lemë të ziejnë.

Në një tigan me 2 lugë vaj ulliri kaurdisim orizin.  Ndërkohë në një tigan tjetër, pasi të kemi grirë qepën shumë imët e kaurdisim atë me pak vaj ulliri. Më pas e shuajmë qepën me verë të bardhë. Paralel  trazojmë orizin derisa kokrra të bëhet pak transparente, shtojmë lëng perimesh pak nga pak dhe e lemë të ziejë duke e trazuar vazhdimisht dhe duke shtuar përsëri lëng. Kështu vazhdojmë për 20 minuta.

Gjatë kësaj kohe shtrydhim 1 limon nëse është i thartë, përdorim 2 limonë nëse vijnë pak të ëmbël.

Shtojmë tek orizi gjatë zierjes së tij qepën të shuar me verë dhe lëngun e limonit. Fillimisht e rregullojmë shijen me kripë dhe piper të zi dhe e lemë derisa orizi të ziejë por të jetë pak i lëngshëm. Në fund shtojmë 1 lugë gjalpë dhe më pas përgatisim një pesto me majdanoz të cilën e realizojmë duke vendosur në një blender majdanoz, vaj ulliri, lëng limoni dhe kripë.

Servirim orizin në pjatë, e dekorojmë me disa pika pesto majdanozi, grijmë hollë pak lëkurë limoni dhe e spërkasim me pak piper të zi të freskët.

/b.ha./Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

  • Sondazhi i ditës:
    26 Dhjetor, 08:05

    Si ka qenë për ju viti 2024?

Lajme të tjera



×

Lajmi i fundit

Mat/ Humbi kontrollin e makinës, 40 vjeçari përplas për vdekje të moshuarin

Mat/ Humbi kontrollin e makinës, 40 vjeçari përplas për vdekje të moshuarin

26 Dhjetor, 18:43