Të infektuara me koronavirus, ndërrojnë jetë brenda 3 ditëve nga njëra-tjetra binjaket identike

Dy motra binjake në Britaninë e Madhe kanë ndërruar jetë brenda tre ditëve nga njëra-tjetra pasi testuan pozitive për koronavirus. Infermierja e fëmijëve Katy Davis, 37 vjeç, vdiq të martën në Spitalin e Përgjithshëm Southampton. Ndërsa motra e saj binjake, Emma, ​​një ish-infermiere, ndërroi jetë në të njëjtin spital më herët, të premten.

 “Gjithmonë thoshin se kishin ardhur në botë së bashku dhe do të dilnin së bashku. Ajo ishin dyshja më e mahnitshme, të cilat edhe jetonin së bashku. Nuk ka fjalë për të përshkruar sa të veçanta ishin", është shprehur për BBC motra e tyre Zoe, e cila ndër të tjera shton se: "E vetmja gjë që ato donin të bënin, ishte të ndihmonin njerëzit e tjerë. Që kur ishin të reja, ato pretendonin se ishin mjeke e infermiere dhe kujdeseshin për kukullat e tyre. Ato u dhanë gjithçka të gjithë pacientëve për të cilët kujdeseshin. Ishin të jashtëzakonshme. Kjo që ka ndodhur nuk duket të jetë e vërtetë.”

Katy, e cila punonte në Spitalin e Fëmijëve Southampton, u testua pozitive për COVID-19. Ajo u shtrua në spital, por humbi jetën të martën në mbrëmje.

Paula Head, shefja ekzekutive e Spitalit Universitar Southampton NHS Foundation Trust, tha: "Katy është përshkruar nga kolegët e saj si një infermiere që njerëzit do të aspirojnë të jenë.”

Duke thënë se: “infermieria ishte më shumë sesa thjesht një punë për të”, Head ka shprehur ngushëllimet ndaj familjes së Katy-t: "Në emër të të gjithëve këtu… përfshirë pacientët tanë dhe komunitetet ku ne shërbejmë, unë do të doja t'i ofroja ngushëllimet tona të sinqerta familjes së saj."

Kolegji Mbretëror i Infermierisë tha: "Ajo është përshkruar si një infermiere e përkushtuar dhe vetëmohuese që kishte kohë për të gjithë. Ajo ndante aftësitë dhe njohuritë e saj për të siguruar një kujdes të shkëlqyer ndaj pacientëve."

Emma Davis kishte punuar në të njëjtin spital si motra e saj në njësinë e kirurgjisë kolorektale për nëntë vjet deri në 2013.

Në një mesazh, oficeri kryesor i infermierisë Gail Byrne tha se: "Emma vuante nga i njëjti problem shëndetësor i mëparshëm sikurse e motra e saj Katy. Kështu që ajo ishte paraqitur në spital me një gjendje jo të mirë shëndetësore, që para testimit të saj pozitiv me Covid-19.

Nuk mund ta përshkruaj me fjalë se sa shkatërruese dhe tragjike është kjo për familjen dhe të gjithë ata që i njihnin. Ema është përshkruar si një infermiere e shkëlqyer që ishte e qetë, e gëzuar dhe një drejtuese e mirë. Ajo ishte shumë e pëlqyer nga të gjithë dhe ishte një anëtare e vlefshme e ekipit gjatë kohës së saj me ne”, përfundoi Byrne.

Motrat binjake identike janë viktimat e radhës të COVID-19 në Britaninë e Madhe, i cili deri tani ka vrarë 19,506 persona dhe 143,464 rezultojnë të infektuar.

TAG:
• Britani e Madhe
• viktima
• binjake identike
• Koronavirus