U hodh për t’u larë në lumin Buna, mjeku i QSUT dëmtime në kokë, u përplas me gurët! Kolegët mesazh: Shërim të shpejtë

TIRANË- Mjeku kirurg i QSUT-së, Arvin Dibra, i cili mbeti i plagosur një ditë më parë pasi u hodh për t’u larë në lumin Buna në Shkodër, ndodhet ende në spital. Një ditë më parë ai iu nënshtrua një ndërhyrje kirurgjikale të vështirë.

Shqiptarja.com sjell detaje të reja nga ngjarja. Burime për gazetarin Ergys Kavaja bëjnë me dije se shefi i Kirurgjisë ka qene duke ngrënë drekë me familjen në një lokal në Dajç të Bregut të Bunës. Ai është futur për t’u larë në lumë dhe është zhytur me kokë. Por, mjeku është përplasur me gurët në thellësi dhe ka marrë dëmtime në kokë.

Kolegët e mjekut Dibra kanë bërë një postim prekës, teksa i urojnë shërim të shpejtë dhe luten që ai të rikthehet shumë shpejt midis tyre pas kësaj sfide shëndetësore.

“Ditën e djeshme, Prof.Dr. Arvin Dibra pas një incidenti të ndodhur, iu nënshtrua një ndërhyrjeje kirurgjikale të kompleksitetit të lartë pranë Qendrës Spitalore Universitare “Nënë Tereza”. Të gjithë kolegët dhe të gjithë ne që e njohim dhe e vlerësojmë, i urojmë shërim sa më të shpejtë dhe të plotë. Falënderojmë ekipin e neurokirurgjisë, që me profesionalizëm dhe përkushtim finalizuan me sukses këtë ndërhyrje! Lutemi të gjithë për ty, Prof. Arvini”, thuhet në postim.

Aksidenti ndodhi më 10 gusht rreth orës 12:25 në fshatin Dajç, dhe 52-vjeçari u transportua me helikopter në Spitalin e Traumës në Tiranë për ndërhyrje mjekësore më të specializuar.

Prof.Dr.Arvin Dibra aktualisht është Shef i Klinikës 1 Kirurgjikale QSUT si dhe drejtues i Departamentit të Kirurgjisë në Universitetin e Mjekësisë.

SI.E./Shqiptarja.com

TAG:
• QSUT
• arvin dibra
• Shkoder