Komisioni i Pavarur i Kualifikimit ka ndërprerë procesin e Vettingut për ish-kryeprokurorin Adriatik Llalla. Vendimi është marrë sot, një javë pasi Llalla u tërhoq nga e drejta për t'u rikthyer gjyqtar në Gjykatën e Apelit dhe për rrjedhojë u largua nga sistemi i drejtësisë, një manorëve kjo për të mos iu nënshtruar filtrave të Vettingut. Report Tv raportoi ekskluzivisht katër ditë më parë se Llalla i ka kërkuar KPK ndërprerjen e verifikimit të figurës së tij.   

Kësisoj, procesi i Vettingut ndaj Llallës, i nisur rreth një vit më parë, ndërpritet përfundimisht, ndërsa Llalla do vijojë të ushtrojë profesionin e avokatit. Vendimi i KPK për Llallën vjen dy ditë pasi Vettingu u ndërpre për ish-anëtarin e Gjykatës Kushtetuese, Besnik Imeraj, i cili gjithashtu dha dorëheqje nga funksioni. 

Vendimi i Komisionit të Pavarur të Kualifikimit:

I përbërë nga:

Roland Ilia Kryesues,

Pamela Qirko Anëtare,

Olsi Komici Relator,

Pasi mori dijeni për dorëheqjen e subjektit të rivlerësimit, z. Adriatik Llalla, më datë 12.02.2018, në zbatim të nenit G të Aneksit të Kushtetutës, vendosi ndërprerjen e procesit të rivlerësimit për subjektin e rivlerësimit, Adriatik Llalla.

Vendimi do të publikohet në faqen zyrtare të internetit të këtij institucioni në zbatim të afatit të përcaktuar në nenin 55/7 të ligjit nr. 84/2016, “Për rivlerësimin kalimtar të gjyqtarëve dhe prokurorëve në Republikën e Shqipërisë”.

Ish-kryeprokurori Adriatik Llalla është akuzuar ashpër ambasadori amerikan në Tiranë, Donald Lu, se nuk hetoi asnjë zyrtar të lartë për korrupsion. Po për akuzën e korrupsionit, Adriatik Llallës i është refuzuar viza nga Shtetet e Bashkuara të Amerikës. Një ditë më parë ishte Sekretari Amerikan i Shtetit, Tillerson i cili u shpreh se ish-kryeprokurorit të Shqipërisë i është ndaluar hyrja në SHBA për shkak se është i implikuar në afera korruptive. 

Redaksia Online
l.q/Shqiptarja.com