Unaza e re, 2 kilometrat që mbajnë
peng zhvillimin e kryeqytetit

TIRANE- Një projekt ambicioz i nisur thuajse 2 dekada më parë dhe që do të çlironte trafikun e kryeqytetit ka mbetur peng i vetëm 2 km rrugë. Shkak janë shpronësimet. Bëhet fjalë për Unazën e Madhe, që ka  mbetur peng i një segmenti të pandërtuar, prej rreth 2 kilometër nga qendra “Kristal” deri tek Shkolla Teknologjike.

Automjetet detyrohen të kalojnë në një kthesë të improvizuar, pasi rruga është ndërprerë. Një pjese e tyre kthehen në rrugën Komuna e Parisit, ndërsa të tjerat vijojnë kalimin nëpër rrugicat e zonës së Selitës.

Automjetet e tonazhit të rëndë detyrohen të kalojnë në urën pranë stacionit të fundit të Tiranës së Re, për të ndjekur rrugën e daljes në shkollën Teknologjike. Nëse do të ishte ndërtuar segmenti i fundit i unazës se re, kalimi do të bëhej përmes tij duke evituar kështu rendimin e trafikut brenda qytetit.

Disa mjete te tjera te mëdha kalojnë përmes Unazës se Vogël te Tiranës. Edhe pse kjo lëvizje është e ndaluar nga ora 7 e mëngjesit deri ne 20 te mbrëmjes. Disa syresh kanë lejen e Bashkisë se Tiranës, pasi u duhet të shkojnë në kantiere ndërtimi brenda qytetit dhe kjo është mënyra e vetme për të shkuar..Por ndërsa ecën me lart ne afërsi të aksit të përfunduar gjen tabelën e punimeve ku shkruhet se “ndërtimi përfundon ne prill te vitit tjetër”, por vetëm për 640 metra.

Aksi prej pothuajse 1 km e gjysme që përfundon ne Shkollën Teknologjike, ka mbetur peng i shpronësimit te 184 familjeve, shtëpitë e te cilëve do të prishen për ndërtimin e Unazës se Madhe. Me një përllogaritje te pak muajve me pare shteti duhet tu paguaje këtyre familjeve mbi 1 miliardë leke për dëmshpërblimet.

Edhe kjo faturë duket se do t'i shtohet listës se gjatë të lekëve që duhet të lëvrojë qeveria e re.

Shkrimi u publikua sot (06.10.2013) në gazetën Shqiptarja.com (print)

Redaksia Online
(d.d/shqiptarja.com)