KUKES - Qyteti i Kukësit nuk do të mbetet pa institucion të arsimit të lartë pasi drejtuesit e filialit të Universitetit të Tiranës dhe të pushtetit vendor pranë Ministrisë së Arsimit, kanë dërguar disa variante rreth të cilave do të diskutohet për të ardhmen e institucionit me qëllim që vitin e ardhshëm filiali do të mund të rifillojë pritjen e viteve të para.

Mexhit Hajdari, drejtuesi i filialit të UT shpreson për ndryshim të situatës vitin e ardhshëm pasi deri tani nuk ka një vendim qeverie për statusin e filialit të Kukësit. Sipas tij varianti më i mundshëm është transformimi i filialit në shkollë të lartë me orientim profesional duke u mbështetur edhe tek nevojat ekonomike të qarkut të Kukësit.

”Po punojmë që ti japim një shpresë Kukësit që të ketë shkollën e lartë në të ardhmen. Opsionet janë të qarta tashmë, janë tre: njëra është mbyllja graduale e filialit, e dyta është rihapja e tij ndërsa e treta është transformimi i filialit të Kukësit në një shkollë të lartë ndoshta me një orientim profesional,"-Mexhit Hajdari.
 

Ndërkohë viti i ri akademik ka nisur vetëm me vite të dyta e të treta për shkak të penalizimeve nga vendimi i Qeverisë dhe Ministrisë së Arsimit , për mos pranimin e viteve të para. Edhe pse nuk ka vite të para mësimi do të zhvillohet me turne pasi ambientet janë të kufizuara dhe të pamjaftueshme për 800 studentë.
 
Redaksia Online