Ura e shembur “pengu” i ëndrrës
së francezit për të parë Zvërnecin

Manastiri i Zvërnecit një ndër atraksionet turistike më të frekuentuara në Vlorë vijon të mbetet një “mollë e ndaluar” për turistët vendas dhe të huaj. Shkak vazhdon të jetë ura e drunjtë, e cila është rrënuar plotësisht dhe për të vizituar manastirin duhet të shkosh me varkat e peshkatarëve. 

Geraldi është një turist i ardhur nga Franca me dëshirën të shijonte bukuritë e Manastirit të Zvërnecit, por që për shkak të urës nuk ishte e mundur.

Pavarësisht se i duhet të kthehet në atdheun e tij me këtë “peng”, ai sërish nuk kursen fjalët e mira për Shqipërinë.

“Shqipëria është një vend shumë i bukur ku gjen relaks dhe qetësi. Un mund të them që ky vend është i mrekullueshëm. Të jem i sinqertë mua më mbeti peng që nuk e vizitova dot manastirin pasi ura që të çon aty është tejet e dëmtuar”

Ura prej 286 metrash është ndërtuar që në vitin 1994 dhe rikonstruksionet ndër vite kanë qenë të pakta, por ajo prej kohësh ishte kthyer në një rrezik për këdo që kalonte mbi të. 

E vetmja mundësi për të shkuar tashmë në manastir janë varkat e peshkatarëve, por jo të gjithë pushuesit kanë nge të paguajnë. Vetë peshkatarët e zonës e pranojnë se mungesa e urës bën që çdo ditë mjaft vizitorë të kthehen mbrapsht e të mos e plotësojnë dëshirën e tyre për të vizituar manastirin.

Ky manastir çdo 15 gusht “pushtohet” nga besimtarët ortodoksë, të cilët kremtojnë festën e Shën Mërisë, por nuk dihet nëse këtë vit ministria do ndërhyjë në kohë për t’ia rikthyer manastirin besimtarëve dhe turistëve






 Foto të tjera 

Redaksia Online
(Gre.M/Shqiptarja.com)