Vangjel Tavo i PS-së, fiton me mbi 1400 vota zgjedhjet në Himarë! Kryetari i ri i bashkisë: Sot fituan himariotët! Gjikuria i mirëpritur për nënkryetar (VIDEO)

Vlore- Partia Socialiste rimerr Himarën, që e humbi në zgjedhjet e 14 majit 2023, me kandidatin e saj të minoritetit grek, Vangjel Tavo.

Këtë herë fitorja është me një diferencë të madhe me 1477 vota plus në krahasim me zgjedhjet vendore të 14 majit, ku kandidati i saj ish kryebashkiaku Jorgo Goro humbi për 19 vota kundrejt Fredi Belerit.  

Kryeministri Edi Rama e quajti fitore spektakolare  rezultatin dhe premton se do të jetë në krah të tij për ta kthyer Himarën 2030 në një prej destinacioneve më të kërkuara të Mesdheut.

“Me urimin për kryebashkiakun e ri të Himarës për fitoren spektakolare, kënaqësinë e mbështetjes domethënëse për Partinë Socialiste në zgjedhjet e djeshme, si edhe vendosmërinë për ta kthyer Himarën 2030 në një prej destinacioneve më të kërkuara të Mesdheut, ku në radhë të parë të gjithë ata që punojnë në industrinë turistike në Greqi, të kthehen për paga më të mira e për ajrin e pazëvendësueshëm të vendlindjes, ju uroj të gjithëve një javë sa më të qetë

Rama shoqëron mesazhin me një video në të cilën ata të dy, Vangjel Tavo dhe Edi Rama në fillim shfaqen si dy skulptura guri që më pas transformohen në Himarë.

Video shoqërohet dhe me vargjet e këngës labe "Bini ju o cula, bini ju longarë'.  Ndërsa në krah të Himarës është dhe një diell, duke simbolizuar se tani lind dielli për Himarën.

Vangjel Tavo fitoi zgjedhjet e pjesshme të Himarës që u mbajtën dje (4 gusht 2024) me një diferencë prej 1477 votash kundrejt kandidatit rival të koalicionit "Bashkë Fitojmë' në opozitë, Petro Gjikuria.

Në zgjedhjet vendore të 14 majit 2023 PS humbi Himarën. Fredi Beleri, i cili kandidoi në emër të koalicionit të opozitës "Bashkë Fitojmë" mori 3840 vota, vetëm 19 vota më shumë se rivali socialist Goro që mori Goro 3821 vota.  Në zgjedhje morën pjesë në votime 7821 qytetarë, ose 34.27% e votuesve. 

Është pritur me gëzim nga socialistët numërimi i votave finale të cilat i jepnin fitoren Vangjel Tavos në KZAZ-në bashkinë e Himarës. Në një prononcim të shkurtër për median, Tavo falenderoi të gjithë himariorët që votuan duke i garantuar se nga sot do të nisë punën për zgjidhjen e problemeve të himariotëve pa dallim. 

 Dua të falenderoj pa përjashtim banorët e bashkisë Himarë, Vranishtë, Lukovë, për durimin që patën duke na dëgjuar gjatë fushatës dhe duke na besuar mandatin në vijim të mandatit 2023. Që sot vazhdojmë punën për ato që kemi premtuar.

Të bashkuar të gjithë, të majtë e të djathtë përtej besimit të secilit, të gjithë për Himarën e bashkuar, për Himaurën e qetë dhe pa probleme.

E prisja rezultatin e kam thënë edhe e kam deklaruar, prisja 1200-1300. Do vazhdojmë punën për turizmin, krahas problemeve të tjera që kanë shprehur banorët gjatë fushatës. Zoti Gjikuria nëse nuk do të largohet në Amerikë është i mirëpritur të  jetë nënkryetari i bashkisë. Siç e theksova bashkia ka nevojë për të gjithë, të majtë e të djathtë. Turizmi është prioriteti, festë nuk ka do të vazhdojmë punën për Himarën dhe himarjotët.

PS ka shumë elementë që mund ta fitonin Himarën. Unë jam një socialist që në vitet e mia bashkë me Blendin që në vitet e fëmijërisë. 

Gazetarja: A ka pasur xhelozi brenda socialistëve këtu në Himarë për ofertën që i keni bërë Gjikurisë?

Ky mendim i imi ekziston te të gjithë kolegët socialistë të bashkisë Himarë. Madje nënkryetarët aktualë më kanë thënë jemi gati të largohemi nëse bëhet kjo, sepse Himara e ka vërtëtë të nevojshme. Falenderoj kryeministrin, kryetarin e Ps dhe zotin Klosi për besimin dhe mbështetjen e dhënë.

Ishin votat e fundit teksa komisionerët e Grupit Numërues të Bashkisë Himarë po bënin numërimin në qetësi, kur ka shpërthyer edhe festa në kampin e socialistëve.

Brohoritje, duartrokitje dhe përqafime në sallën ku ndodheshin edhe përfaqësuesit politikë, mbështetësit dhe vetë kandidati i PS, Vangjel Tavo, i cili rezultoi fitues ndaj kandidatit rival të opozitës, biznesmenit Petro Gjikuria, me mbi 55% të votave.

I pranishëm edhe përfaqësuesi politik socialist Blendi Klosi, që bashkë me të tjerët rrethuan Tavon dhe e uruan për fitoren e zgjedhjeve. Kryebashkiaku i ri, që pret të marrë edhe “bekimin” e KQZ, ka deklaruar se do fillojë punën menjëherë, duke u fokusuar fillimisht te turizmi, teksa nuk parashikohet festë e socialistëve në Himarë edhe për shkak të respektimit të rivalit dhe mbështetësve të tij.

Megjithatë mbështetësit nuk i janë bindur, duke dalë në rrugë me festime dhe hedhje fishekzjarrësh. Policia po monitoron situatën nga afër, për të shmangur incidentet apo ndonjë përplasje të mundshme.

Vangjel Tavo është shpallur fitues i zgjedhjeve të pjesshme në Himarë.Kandidati i PS fiton zgjedhjet me 1477 vota më shumë se Petro Gjikuria. 

Tavo ka marrë 5022 vota, pra 58.62%  ndërkohë Petro Gjikuria ka marrë 3545 vota, 41.38 % 

Sipas të dhënave zyrtare të Komisionit Qëndror të Zgjedhjeve pjesëmarrja në zgjedhjet e djeshme në Himarë rezultoi 37.69 %  ku nga 23.074 votues në listë morrën pjesë në votime 8678 persona. Një pjesëmarrje me gati 800 vota më e lartë se në zgjedhjet vendore të 14 majit 2023 ku në bashkinë e Himarës votuan 7655 zgjedhës.