Ministrja e Mbrojtjes, Olta Xhaçka, ka bërë një urim të veçantë për ushtarët e Forcave të Armatosura, me rastin e festave të fundvitit. Ministrja shkruan në ‘Facebook’ se është nder dhe privilegj i madh të punojë me këta njerëz të jashtëzakonshëm të FA.

Përmes një mesazhi personal, ajo i falënderon gjithë ushtarët e FA në emër të qeverisë për gjithçka kanë bërë, si dhe shpreh vlerësimin më të lartë për sakrificat e tyre dhe të familjarëve.

“Është nder dhe privilegj i madh të punoj me ju, njerëz të jashtëzakonshëm të Forcave të Armatosura të Republikës së Shqipërisë. E meqënëse jemi në këtë atmosferë festash të fundvitit, dua t’ju dërgoj këtë mesazh personal, për t’ju falenderuar në emër të qeverisë, për gjithçka keni bërë, si dhe t’ju them se, sa shumë i vlerësojmë gjithë sakrificat që ju dhe familjet tuaja bëni. Keni fikur zjarre, keni përballuar përmbytje, keni ngritur ura e keni shpëtuar fëmijë. Keni projektuar siguri përtej kufijve të vendit tonë. Keni punuar në heshtje për një vit të tërë, me vetëmohimin e ushtarakut dhe sakrificën e shqiptarit. Kudo ku jeni, në sherbim të Atdheut, na frymëzoni të gjithëve me përkushtimin dhe atdhedashurinë. Ndaj, nga zemra, ju uroj një vit të paqtë, të mbarë dhe të begatë!”, shkruan Xhaçka.

d.c./shqiptarja.com