Vdekja e senatorit McCain, reagon politika shqiptare: Humbëm një mik, vështirë të zëvendësohet

Pas lajmit të ndarjes nga jeta të senatorit amerikan John McCain, reagime të shumta kanë ardhur nga figura të rëndësishme të politikës shqiptare, të cilat e cilësuan senatorin si një mik të mirë të Shqipërisë. Kjo pasi senatori McCain ka qënë një nga mbështetësit më të mëdhenj të Kosovës, në luftën e saj për Pavarësi.

Me anë të një statusi në Facebook ka reaguar edhe Ministri i Shtetit për Diasporën, Pandeli Majko. Në statusin e tij Majko shkruan se Shtetet e Bashkuara të Amerikës kanë humbur një politikan të veçantë dhe me vlera të rralla, të cilin do ta kenë shumë të vështirë ta zëvëndësojnë.

Shtetet e Bashkuara të Amerikës kanë humbur një politikan të vecantë. Senatori John McCain, ndërroi jetë. Ky ish-pilot i forcave ajrore të marinës amerikane përfaqëson një nga karakteret më të skalitura të politikës amerikane.

LEXO EDHE:
Meta në Vlorë: ‘Nëndetësja 105’ është kthyer në bazë, Sazani do jetë aty ka qenë jetë e mot

Senatori McCain në politikë dhe në jetë ishte po i njëjti. Vdekjen e priti si ushtaraku që në luftë e ka njohur atë. Ndërpreu mjekimet me vullnetin e tij. Ndroi jetë ashtu sic jetoi. Politika amerikane do ta ketë të vështirë ta zëvendësojë senatorin John McCain. Ishte vërtet një fat ta kishe këtë burrë në krahun e kombit shqiptar.

Pandeli Majko, ministër

Statusi i Pandeli Majkos 

Për vdekjen e tij, ka reaguar edhe presidenti Meta, i cili u shpreh se një lajm i tillë është tejet i hidhur për të gjithë shqiptarët, pasi humbëm një nga mbështetësit më të vendosur të çështjes së Kosovës.

Ndarja nga jeta e Senatorit John McCain është një lajm i hidhur për mua dhe për të gjithë shqiptarët.

Sot u largua nga jeta një hero lufte dhe një patriot i madh, njeriu që i shërbeu kombit të tij me vetëmohim, heroizëm e ndershmëri të pashoqe. 
Ai i shërbeu lirisë dhe të drejtave të njeriut në botë e veçanërisht në Ballkan.

Senatori McCain ishte një nga mbështetësit e vendosur të çështjes së Kosovës dhe kauzës për lirinë dhe pavarësinë e saj.

Ai u bë një ndër mbështetësit kryesorë të antarësimit të Shqipërisë dhe të rajonit tonë në NATO për të cilën të gjithë shqiptarët i janë mirënjohës.

Angazhimi i përkushtuar i njerëzve të tillë si McCain për cështjen e të drejtave dhe të lirive të popujve të shtypur në botë e kanë bërë SHBA-në një vend lider të demokracisë dhe rriti simpatinë e saj në gjithë botën.
Sot shqiptarët humbën një mik të veçantë e të pazëvendësueshëm. 
U prehtë në paqe shpirti i tij!

Ilir Meta, president

Postimi i Metës në Facebook

Për vdekjen e McCain, nuk ka munguar as ngushëllimi i kryeministrit të Kosovës, Ramush Haradinaj. Në statusin e tij, Haradinaj u shpreh se ndjehej i pikëlluar nga lajmi pasi Kosova  humbi mikun e saj të çmuar.

I pikëlluar nga lajmi për vdekjen e Senatorit republikan të ShBA-së John McCain, familjes së tij, Senatit dhe qytetarëve amerikanë, u shpreh ngushëllimet më të sinqerta të popullit dhe të Qeverisë së Kosovës.

Familja humbi të dashurin e vet, Amerika Heroin, kurse Kosova mikun e çmuar, pa të cilin rrugëtimi ynë drejt lirisë dhe shtetkrijimit do të ishte më i vështirë.

Fitues në luftë dhe në paqe, luftëtar i madh për të drejtat e njeriut dhe ligjvënës i pashoq.
Hyri në zemrat tona si humanist dhe do ta ketë vendin e nderit në kujtesën shtetërore të Kosovës.

Lamtumirë mik i Kosovës, John McCain. Pusho i qetë!

Ramush Haradinaj

Postimi i Ramush Haradinaj

Një reagim për vdekjen e McCain ka ardhur edhe nga kryetari i Kuvendit, Gramoz Ruçi dhe nga ministrja e Mbrojtjes, Olta Xhaçka.

Senatori McCain, një shpirt i lirë u ngjit në përjetësi. Ishte bir i sakrificës për kombin, lirinë dhe paqen. Hero i Amerikës, komandant legjendar dhe senator vizonar. Ishte mik i madh e i sinqertë i Shqipërisë, i përkushtuar për një Kosovë të pavarur, demokratike dhe multietnike.

Gramoz Ruçi, kreu i Kuvendit

Ngushëllime familjes dhe respekt të pafund për njeriun që mbetet në sytë e amerikanëve dhe gjithë botes, hero lufte, patriot dhe luftëtar i së drejtës! Shqiptarët humbën një mik të madh që luftoi deri në fund për pavarësinë dhe lirinë e Kosovës! U prehsh në paqe Senator McCain. Zemrat dhe lutjet tona janë me Ju!

Olta Xhaçka, ministre

TAG:
• Ilir Meta
• Ramush Haradinaj
• pandeli majko
• john mcCain

Sondazhi i ditës:

A ka politika frikë nga SPAK-u?

• Po

  69.2%

• Jo

  26.2%

• Nuk e di

  4.7%

Vota total: 1927

• Sondazhi i ditës:

  A ka politika frikë nga SPAK-u?

  Po Jo Nuk e di