Historia e Leonard Farrukut i cili u gjet i vdekur më 12 dhjetor 2023 në anijen hotel të menaxhuar nga qeveria angleze, “Bibby Stockholm” rikthehet në qendër të vëmendjes së medias britanike.
Motra e azilkërkuesit shqiptar ka kërkuar ndihmë pasi familja nuk mund të përballojë shpenzimet financiare për të sjellë trupin e 27 vjeçarit në atdhe ku dhe të prehet për herë të fundit.
E motra, Jola Dushku duke folur për BBC e quajti një tragjedi të dyfshtë.
![](https://shqiptarja.com/template/img/NO_ALFA_Kuadrate shqiptarja.png)
"Ishte një tragjedi që humbëm një vëlla në rrethana të tilla, por tani po përballemi me një tragjedi të dyfishtë që nuk mund ta kthejmë trupin e tij në shtëpi për të bërë ceremoninë mortore. “Nuk e dimë se sa kohë do të duhet që të mblidhen paratë” deklaroi ajo për BBC
Për të arritur këtë Familja kërkoi ndihmë duke hapur, 5 ditë më parë një adresë në gofundme, për të mbledhur shumën e cila do të shfrytëzohej për të sjellë trupin e pajetë të Farrukut në Shqipëri.
Nga një verifikim që shqiptarja.com bëri në mbrëmje 710 persona u treguan të gatshëm për të dhuruar duke e çuar fondin e mbledhur në 14 mijë paund.
"Jeta e vëllait tonë Leonard Farruku përfundoi në mënyrë të paimagjinueshme për të gjithë ne kur ishim në Mbretërinë e Bashkuar. Një hetim është hapur për rrethanat e vdekjes së tij. Trupi i Leonardit ndodhet në morgun e Dorset nga dita kur humbi jetën, më 12 dhjetor 2023. Ne kërkojmë ndihmë për të mbledhur fonde që trupi i Leonard të kthehet nga Britania e Madhe në shtëpi në Shqipëri për të pushuar në paqe" shkruante Jola Farruku në faqen e gofundme.
Sekretari i Shtetit për Çështjen e Brendshme James Cleverly deklaroi pak ditë më parë se vdekja e papritur e Leonard Farrukut do të hetohej "plotësisht".
Një raport që zbuloi se politika e strehimit të azilkërkuesve në anijen Bibby Stockholm ishte diskriminuese në bazë të moshës dhe gjinisë, u fshi nga faqja e internetit e qeverisë muajin e kaluar, dy ditë pasi u publikua.
Një shënim në faqen e internetit thoshte se vlerësimi i ndikimit ishte "publikuar gabimisht".
Mjeku ligjor i Dorset Rachael Griffin, cituar nga BBC është shprehur se asnjë person tjetër nuk ishte i përfshirë në vdekjen e Farrukut, trupi i të cilit mbetet në morg, ndërsa shkak i vdekjes është mbytja si pasojë e varjes. Hetimet janë shtyrë deri në korrik për të mbledhur prova nga autoritetet e anijes
![](https://shqiptarja.com/template/img/antipiracynote.jpg)
![](https://www.shqiptarja.com/template/img/sh_logo1.png)