POP 5

Lajmet më të lexuara të 5 minutave të fundit

Politikë

Veliaj me këshilltarët e rinj të Këshillit Bashkiak: Kjo nuk është fitore për të na ngritur në qiell, por për të na ulur me këmbë në tokë

Pas fitores në zgjedhjet e 14 Majit, kryetari i Bashkisë së Tiranës, Erion Veliaj zhvilloi dje pasdite një takim me anëtarët e rinj të Këshillit Bashkiak, të cilët do të jenë pjesë e Parlamentit të qytetit në 4 vitet e ardhshme.

Pas fitores në zgjedhjet e 14 Majit, kryetari i Bashkisë së Tiranës, Erion Veliaj zhvilloi dje pasdite një takim me anëtarët e rinj të Këshillit Bashkiak, të cilët do të jenë pjesë e Parlamentit të qytetit në 4 vitet e ardhshme. Në takimin falenderues me ta, Veliaj tha se ky ishte rasti më domethënës ku një forcë politike arrin të përkthejë fitoren e bashkisë në fitore edhe të shumicës së Këshillit Bashkiak.

“Kjo është vërtet një skuadër fitimtarësh sepse rezultati na dha të drejtë. Ne zbatuam këshillën e kryeministrit Edi Rama, kryetarit të Partisë Socialiste, që të sigurohemi që vota nuk trajtohet si qokë, vota nuk trajtohet si lëmoshë apo si bakshish. Çdo votë është e shenjtë, si vota për kryetarin, ashtu edhe vota për Këshillin Bashkiak. Ndaj, jam krenar që siguruam që çdo votë për kryetarin të përkthehej në një votë për Partinë Socialiste dhe këshilltarët, për të dëshmuar që jemi jo vetëm forca më patriotike, jo vetëm forca më bashkëkohore, jo vetëm forca më progresiste, por edhe forca më e disiplinuar politike në Republikën e Shqipërisë. Kjo është partia jonë dhe skuadra jonë! Ju falenderoj për këtë,” u shpreh Veliaj.

Ai tha se kjo votë duhet trajtuar si një përgjegjësi e madhe, pasi qytetarët dhanë besimin për t’i përfaqësuar në 4 vitet e ardhshme për çdo problematikë dhe shqetësim.

“Me këtë fitore të madhe vjen edhe një përgjegjësi e madhe. Detyra për secilin prej anëtarëve të Këshillit Bashkiak është të sillet si një deputet i qytetit, jo vetëm kur garon, por çdo ditë, duke filluar që sot, si një kujtesë që kjo nuk është fitore për të na ngritur në qiell, por kjo është një fitore për të na ulur me këmbë në tokë,” nënvizoi ai.

“Shpresoj shumë që respektin e madh që ju bënë njerëzit duke ju sjellë në Parlamentin e kryeqytetit, jo vetëm të Shqipërisë, por të të gjithë shqiptarëve, të kujdeseni si për një enë kristali, e cila duhet të trajtohet me respekt që të mos thyhet, sepse i tillë është besimi. Mund të jetë shumë e lehtë për ta marrë, por shumë i vështirë për ta mbajtur. Nëse do ta trajtoni me respekt, si diçka të shenjtë, këtë besim që ju dhanë njerëzit, jam i sigurt që njerëzit do vazhdojnë t’ju japin besimin, do vazhdojnë të votojnë Partinë Socialiste, do vazhdojnë të votojnë djemtë dhe vajzat, burrat dhe gratë që sjellin zërin e tyre në Këshillin Bashkiak,” vijoi Veliaj.

Kryetarja e Këshillit Bashkiak, Romina Kuko u shpreh mirënjohëse ndaj çdo qytetari që i dha shumicën PS në Tiranë.

“14 Maji ishte një ditë krenarie për ne. Ishte një ditë kur qytetarët e Tiranës vendosën të besonin alternativën dhe ofertën politike të Erion Veliajt dhe Partisë Socialiste, duke na besuar tani me një shumicë absolute të këshillit bashkiak me 34 këshilltarë. Sot në emër të të gjithëve dua të falenderoj çdo qytetar që i ka besuar ofertës, premtimeve tona dhe mbi të gjitha i ka besuar punës tonë që duhet të vazhdojë,” tha ajo.

Rendit zhvillimet sipas orarit:
Ora 14:13
Veliaj me anëtarët e rinj të Këshillit Bashkiak: Kemi shumicën absolute, por na duhet bashkëpunimi i të gjithëve

 

Kryetari i Bashkisë së Tiranës, Erion Veliaj, në takimin e djeshëm me anëtarët e rinj të Këshillit Bashkiak, tha se edhe pse Partia Socialiste ka shumicën, sërish lipset bashkëpunimi me të gjithë anëtarët e forcave të tjera politike, që do t’u bashkohen atyre në 4-vjeçarin e ardhshëm.

“Ne kemi një shumicë absolute dhe nuk kemi nevojë për votat e të tjerëve. Por kemi dëshirë të madhe për votat e të tjerëve, për ta çuar këtë qytet përpara. Ndaj, ftesa ime sot është që edhe anëtarët e tjerë, edhe ata që morën më pak vota dhe përfaqësojnë bindje të tjera, të ndryshme nga tonat, të kenë mundësi që ta pasurojnë Këshillin tonë Bashkiak. Ta pasurojnë me ide, ta pasurojnë me propozime. Nëse do të kthehemi në imitim të konferencave ditore për shtyp, kush është mafioz dhe kush është kriminel, atëherë sigurisht ne do përkthejmë në nivel lokal diçka bajate që e shohim përditë në nivelin qendror. Ashtu si Kryeministri përpiqet përditë të shkojë përtej numrave tanë për të krijuar një konsensus kombëtar, për të trajtuar këtë përvojë si një vëllazëri kombëtare, ku ne të gjithë bashkë ecim përpara, do të doja që diçka e tillë të përkthehej edhe në qytetin tonë dhe në Këshillin tonë Bashkiak,” tha Veliaj. 

Ai tha gjithashtu, se bashkëpunimi i këshilltarëve nevojitet edhe në nivel qarku, me të gjitha Bashkitë, ku po ashtu, PS ka dalë forcë e parë në çdo këshill. 

“Janë të gjitha bashkitë e qarkut që do duhet të bashkëpunojnë për një mbarëvajtje të të gjithë rajonit tonë, që është rajoni që prodhon më shumë se gjysmën e ekonomisë, ku bashkë me Kamzën, Vorën, Rrogozhinën dhe Kavajën, jeton edhe më shumë se gjysma e popullsisë së vendit. Çdo ditë do të doja që, përveçse të kujtoni detyrat tuaja familjare, apo civile, të kujtoni edhe këtë detyrë të shenjtë, jeni përfaqësues të qytetit të Tiranës. Është një privilegj i madh, është edhe një përgjegjësi e madhe,” nënvizoi ai.

SI.E./Shqiptarja.com

SI.E./r.k./Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

  • Sondazhi i ditës:

    Rithemelimi propozon rikthimin e koalicioneve të vjetra, a jeni dakord?

Lajme të tjera



×

Lajmi i fundit

6 shenja që tregojnë se personi përballë jush po gënjen

6 shenja që tregojnë se personi përballë jush po gënjen

20 Prill, 09:44