Në fjalën e tij, Veliaj tha se teknologjia dhe gjithë risitë që ajo sjell duhen parë edhe si mjet në shërbim të shoqërisë për një shërbim më të mirë dhe që u kursen më shumë kohë qytetarëve.
“Shumë shpejt ne do të lëshojmë një aplikacion që quhet "Tirana ime" të cilin çdo qytetar i Tiranës do të ketë mundësi ta shkarkojë dhe është i bazuar në një eksperiencë shumë të ngjashme që ne kemi përdorur në fushatë. Atëherë quhej "Unë për Tiranën", kjo quhet "Tirana Ime", ku u kërkonim qytetarëve që të fotografonin dhe të ngarkojë në një template gjithë problematikën e Tiranës”, u shpreh Veliaj.
Sipas Veliajt me anë të aplikacionit çdo qytetar nga telefoni i tij vetëm duke klikuar në të mund të marrë informacionin e duhur se si është gjendja e trafikut në çdo rrugë të Tiranës.
“Platforma është e tillë që çdo njeri nëse është në kategorinë e ndotjes apo trafikut, të bëjë diçka për trafikun për shembull. Kemi hartën e trafikut në Tiranë, për shembull, në çdo moment me një kod ngjyrash do të shfaqet se si duket ekzaktësisht trafiku”, sqaroi kryebashkiaku.
Kryetari i Bashkisë së Tiranës tha se me anë të këtij aplikacioni tashmë infomacioni nuk do të jetë i aksesueshëm vetëm për zyrtarët e bashkisë, por për të gjithë qytetarët.
“Ne kishim një teknologji bazike në bashki, por ishte e aksesueshme për burokratët, pa pikë aksesi për publikun. Kjo do të thotë se mund të kesh investime në kamerat e qytetit por për sa kohë kjo teknologji nuk është në dobi të qytetarëve, një qytetar nuk mund të aksesojë kur të dojë segmentet jeshile, segmentet apo segmentet e kuqe që tregojnë trafik. Nëse nuk është e dobishme për qytetarët atëherë çfarë na duhet ne nëse vetëm 5 policët e bashkisë kanë akses në këtë informacion?”, u shpreh Veliaj.
Gjithashtu në kuadër edhe të modelit “Smart City”, kreu i Bashkisë ka paralajmëruar edhe një sërë iniciativash të tjera që do lehtësojnë shumë më tepër angazhimin e qytetarëve në marrjen e shërbimeve burokratike.
Sipas tij pretendohet se 75% të shërbimeve që merren aktualisht në zyrat e administratës lokale, të mund të merren duke përdorur teknologjinë, pa qenë nevoja për mbajtjen e radhës.
“Por ama se si mundet që ne gjithë këto burokraci ne të kemi disa vendime që janë voluminoze si 75 % e shërbimeve që mund fare mirë të automatizohen. Për sa kohë një njeri me ID e vet të gjitha këto mund t'i printojë nga një automat nuk ka pse ne të vazhdojmë një sistem shërbimi komplet në nivelin mesjetar”, tha Veliaj.
Redaksia Online
(u.s/shqiptarja.com)