Në Shkodër, bastionin historik të së djathtës, socialistët kërkojnë që të bëjnë historinë në zgjedhjet vendore të 14 majit, me Benet Becin! Duke e konsideruar Shkodrën si një qytet me shumë peshë, kandidati i Partisë Socialiste për kryeqendrën e veriut, Benet Beci, i ftuar në Report Tv në emisionin 'Real Story' me gazetarin Sokol Balla, tha se e ka pritur dhe mbi të gjitha e ka dashur që të jetë në garë për të drejtuar Shkodrën. Beci shprehet optimist për një rezultat triumfues në Shkodër, e premtoi se qyteti ka nevojë për shumë punë për t'ju kthyer shkëlqimit.

‘Gjithë destinacioni ime prej shumë kohësh është nisur për të shkuar në Shkodër. Gjithë eksperienca ime, zgjedhja si deputet në Shkodër edhe çdo eksperiencë që kisha. Më duket si një destiny (fat) është nisur për të ardhur te kjo pikë. Nuk ka thirrje më të madhe sesa thirrja dhe ajo që mund të bësh në qytetin tënd. Jo vetëm e kam pritur dhe dashur por më duket është gjëja e duhur në kohën e duhur për të dhënë për qytetin që e sheh se nuk janë aty ku duhen. Shkodra është një qytet me shumë peshë! Është e thellë për arsye të historisë dhe traditës. Unë besoj se në Shkodër ka shumë rëndësi edhe tradita edhe familja dhe ajo që kemi bërë. Shkodra jo vetëm më mirëpret, pro kam kuptuar se më mirëpret me shpresë. Shkodra jo vetëm mirëpret, por po ngremë një shpresë ashtu siç shkodranët e mendojnë. Ka nevojë për shumë punë për t’ju kthyer shkëlqimit.’- tha Beci.

Beci theksoi se prioritet për të dhe kryesocialistin Edi Rama, për Shkodrën, është që të zgjidhen problemet që nuk janë zgjidhur për shkak se janë penguar nga retorika politike.

‘Rama ka sjellë ofertën më të mirë që ai mendon. Unë kam një ofertë pune. Prioriteti i Ramës është për të zgjidhur probleme që nuk janë zgjedhur akoma në Shkodër dhe që janë penguar nga retorika politike. E gjithë pritshmëria sot në Shkodre, e racionalitetit është që në të diskutojmë për të zgjidhur problemet. Ka një pritshmëri të jashtëzakonshme!’- u shpreh Beci.

Benet Beci thotë se nuk ka asnjë prioritet tjetër përveçse për të bërë Shkodrën me çdo kusht, në kuptimit që të gjehet një zgjidhjet e problemeve.

‘Kam shumë besim tek Shkodra. Kam shumë kënaqësi, kjo është gjëja që kam dashur të bëj dhe do ta bëj më shumë dashuri dhe aq profesionalizëm sa kam. Unë nuk kam asnjë prioritet tjetër dhe do ta bëj Shkodrën me çdo kusht, në kuptimin e gjetjes së zgjidhjeve të problemeve pa u qarë.  Rama ka një vullnet të jashtëzakonshëm për ta bërë Shkodrën.’- u shpreh Beci.

Në fund të fjalës së tij, Beci tha se do të mirëpresë këdo nga të gjitha krahët, në këtë betejë të përbashkët, për të bashkëpunuar dhe punuar ndershëm e me transparencë për zhvillimin e qytetit.

Rendit zhvillimet sipas orarit:
Ora 22:50
Beci prezanton projektin për transformimin e Shkodrës në ‘Real Story’: Do të kushtojë rreth 20 mln dollarë

 

Kandidati i PS-së për bashkinë e Shkodrës, Benet Beci i ftuar në Real Story në Report Tv me gazetarin Sokol Balla prezantoi edhe projektet që do të vërë në jetë nëse fiton drejtimin e bashkisë më 14 maj. Beci prezantoi projektin që përfshin krijimin e një parku multifunksional buzë Bunës, me një hapësirë prej 18 hektarësh, që do të përfshijë portin pranë Urës së Bunës si një pol i ri turistik, si dhe ngritjen e një muzeu. Sipas Becit projekti për hyrjen e Shkodrës do të kushtojë rreth 20 milionë dollarë.

‘E shikoj Shkodrën sot si një qytet që nuk të fton. Mos të harrojmë se Shkodra është porta për hyrjen në Europë. Projekti i parë është për hyrjen e Shkodrës. Do të ketë edhe një rrugë për këmbësorët dhe biçikletat, si edhe një muze si tribut për të shkuarën e Shkodrës. Do të ketë fusha sportive si dhe parqe lojërash.’- u shpreh ndër të tjera Beci.

Po ashtu Beci u shpreh se ka hedhur idenë e Fondit të Zhvillimit të Shkodrës, për të cilin tha se do të ishte mekanizmi me të cilin bashkia do të menaxhonte fondet e donatorëve dhe të qeverisë në mënyrë që të realizojnë projekte të tilla.

‘Kam hedh idenë e Fondit të Zhvillimit të Shkodrës. Do të ishte mekanizmi që të merrte fondet, të ishte i varur nga bashkia i cili menaxhon fondet e donatorëve dhe të qeverisë dhe me procedura strikte dhe të qarta të kishim mundësi që të realizonim projekte të tilla. Na duhet kombinimi mekanizmit të projekteve me mekanizmin financiar.’- tha Beci.

M.Q./Shqiptarja.com