Vendosja e pritave në lumin Shkumbin, Balla: Pas 30 vitesh shpëtohen 100 ha tokë bujqësore

Ujërat e lumit Shkumbin kanë qenë një problem i madh për banorët në Shushicë, pasi prekte gjithë tokat bujqësore. Investimi në ndërtimin e pritave përgjatë pjesës jugore të lumit Shkumbin pranë lagjes së Cogës në Shushicë të Elbasanit bëri të mundur shpëtimin dhe rekuperimin e 100 hektarë tokë bujqësore.

Kryetari i Grupit Parlamentar Taulant Balla së bashku me Kryetarin e Bashkisë së Elbasanit Gledian Llatja dhe deputetin Arben Kamami inspektuan punimet që ato të jenë gati  përpara shirave të vjeshtës.

"Kemi ardhur për të ndjekur nga afër një prej zgjidhjeve të problemit më të madh që ka kjo zonë e Elbasanit, që shkaktohet për shkak të përmbytjeve të lumit Shkumbin, e cila pas 30 vitesh, më në fund shpëton 100 ha tokë të cilat ishin pre e përmbytjeve të lumit Shkumbin", ka theksuar Balla.

Sipas tij plani tjtër është që zona të pyllëzohet dhe  lumi Shkumbin të mos jetë rrezik, por mundësi e mirë për zhvillimin e bujqësisë duke u përdorur për vaditje.

Kryetari i Bashkisë Z. Llatja theksoi se puna do të vijojë më tej me pyllëzimin e zonës, duke i shtuar mushkërinë e gjelbër Elbasanit, duke qenë se është shumë pranë qytetit.

"Është përfituar një sipërfaqe toke e konsiderueshme, një pjesë tjetër është ruajtur nga përmbytjet. Kjo sipërfaqe do të pyllëzohet shumë shpejt, do të jetë ndër prioritetet e Bashkisë së Elbasanit duke i shtuar edhe kurorën e gjelbër qytetit duke qenë se është shumë pranë tij", shprehet Llatja.

 Deputeti Arben Kamami vuri në dukje se një punë po kaq e mirë është bërë edhe në disa zona të tjera të cilat përmbyteshin nga Shkumbini, ku përfshihet fshati Muriqan dhe u vazhdua me argjinaturën pranë fshatit Polis Valë.

TAG:
• permbytje
• lumi shkumbin
• toka bujqesore
• vendosja e pritave