Vetëvendosje, projektligj për
mbrojtjen e burimeve të gazetarisë

Deputetja e Lëvizjes VETËVENDOSJE, Alma Lama, dorëzoi sot në Kuvendin e Kosovës “Projektligjin për mbrojtjen e burimeve të gazetarisë”, i cili synon mbrojtje për gazetarët dhe profesionistët e tjerë që punojnë në media, për sa i përket ruajtjes së konfidencialitetit të burimeve të informacionit.

Sipas këtij projektligji, gazetarët kanë të drejtë të mos i thonë burimet e tyrë përpra organeve të drejtësisë, ndërsa asnjë autoritet tjetër nuk mund kontrollojë redaksitë apo shtëpitë e tyre për t’ju marrë shënimet apo materialet që mbledhin për shkak të profesionit.

Deputetja e VETEVENDOSJE-s thotë se “projektligji është mbështetur në përvojat më të mira të vendeve të BE-së si dhe në vetë rekomandimet e Federatës Ndërkombëtare të gazetarëve (IFJ) dhe Federatës Evropiane të Gazetarëve si dhe në praktikën gjyqësore të Gjykatës Evropiane për të drejtat e njeriut”.

Gjatë fazës së hartimit janë thirrur për të marrë pjesë edhe palët e interesuara, përkatësisht gazetarët e mediave të ndryshme në Kosovë.
(gm/shqiptarja.com)