Ministri i Brendshëm Fatmir Xhafaj ka zhvilluar një takim këtë mëngjes me kryeprokuroren e përkohshme, Arta Marku. Xhafaj ka qëndruar rreth 30 minuta në zyrën e Markut. Sipas njoftimit të shpërndarë nga Prokuroria, në takimin Xhafaj-Marku u diskutua mbi forcimin e bashkëpunimit ndërinstitucional, me fokus të veçantë realizimin e procesit të Vetingut, luftën kundër korrupsionit dhe trafikut të lëndëve narkotike.

Sipas njoftimit, në qendër të diskutimit ishte procesi i Vetingut në sistemin e drejtësisë, si edhe i njëjti proces i pritshëm edhe në radhët e Policisë së Shtetit. Dy titullarët shprehën dakordësinë e plotë se këto procese kërkojnë një komunikim të vazhdueshëm dhe intensiv, me qëllim realizimin sa më të plotë dhe të shpejtë të pastrimit të institucioneve të sigurisë dhe të sistemit të drejtësisë nga zyrtarët me probleme në integritetin profesional dhe personal.

xhafaj te prokuroria e pergjithshme
(Ministri Xhafaj pas takimit me kryeprokuroren)

"Në vijim të takimit, Marku theksoi rëndësinë specifike që ka bashkëpunimi ndërmjet Prokurorisë dhe Ministrisë së Brendshme në forcimin e sigurisë në vend, si edhe në pëmbushjen e prioriteteve të vendit për integrimin në Bashkimin Europian. Prokurori i Përgjithshëm u shpreh se do të angazhohet maksimalisht për koordinimin ndërinstucional, me qëllim zhvillimin me sukses të hetimeve të rëndësishme, si edhe të çdo procedimi penal me impakt të lartë shoqëror. Ministri i Brendshëm, Xhafaj garantoi se institucioni që ai drejton, si edhe Policia e Shtetit, do të vijojnë forcimin e mëtejshëm të bashkëpunimit për rritjen e hetimeve proaktive, ku prioritet do të jetë lufta kundër korrupsionit", thuhet në njoftimin e Prokurorisë.

Javën e kaluar kryeprokurorja Arta Marku priti në një takim ambasadorin Donald Lu. Ndërsa një ditë më parë në zyrën e saj mbërriti kreu i SHISH, Helidon Bendo dhe ambasadorja e Gjermanisë në Tiranë, Sussane Schutz. 

Redaksia Online