VIDEO/ Armando Broja shënon për Chelsean, i gjithë stadiumi në këmbë! Shqiptari gol me kokë, feston me 'shqiponjë'

Chelsea fitoi 4-0 me Preston në 1/32 e FA Cup dhe kalon më tej. Goli i parë i ndeshjes u shënua nga Armando Broja, me sulmuesin e Kombëtares që "shtroi udhën" për suksesin e Bluve. Goli i dytë këtë sezon ka kthyer buzëqeshjen për 22-vjeçarin, që pranon se ka presion pasi e di që të gjithë duan që të gjejë gola.

"Të vish nga pankina dhe të luash disa ndeshje dhe të mos shënosh dot gol nuk është e lehtë. Jam shumë i emocionuar dhe i lumtur që munda ta arrij atë gol sot. Shpresoj që të ketë shumë më tepër në të ardhmen. Momente të tilla janë ato që të bëjnë të lumtur dhe të sjellin një buzëqeshje në fytyrën tënde. Shumë njerëz nuk i shohin ditët e këqija. Ka shumë presion mbi supe kur pritet të shënoni çdo ndeshje. Unë përpiqem të lë ditët e këqija që më kanë kaluar dhe të shikojë ditët e mira. Sot ishte një nga ato ditët më të mira", tha Broja.

Armando Broja, sulmuesi i Kombëtares shënoi golin e dytë sezonal me Chelsean dhe këtë e bëri në ndeshjen e 1/32 të FA Cup kundëer Preston. Broja shënoi në fitoren 4-0 të të tijve, duke qenë ai që i hapi rrugë suksesit.

Pas ndeshjes, për mediet trajneri i Bluve Mauricio Pochettino vlerësoi lojën e 22-vjeçarit shqiptar, duke thënë se duhet të ketë besim në aftësitë e tij dhe të qëndrojë pozitiv.

" Një fitore shumë e mirë. Në pjesën e parë isha pak i zhgënjyer. E nisëm shumë keq. U thashë lojtarëve pas pjesës së parë që duhej të rrisnim energjinë dhe të bënim ndeshjen tonë me Preston", tha trajneri.

I pyetur për besimin që goli do i jepte Brojës, Pochettino tha se sulmuesi duhet të buzëqeshë dhe të fitojë besimin në vete.

"Unë mendoj se duhet të jetë e mahnitshme. Ai duhet të buzëqeshë, të jetë pozitiv dhe të ndryshojë gjuhën e trupit. Mendoj se kur të performojë mirë dhe të gjejë rrjetën, ai do të përmirësohet. Është e rëndësishme për ekipin dhe për të që të përmirësojë besimin e tij”, tha argjentinasi.