SPANJË - Një pëllumb i lënduar ndaloi ndeshjen gjatë fitores 3-2 të Atletico Madridit kundër Real Sociedadit të shtunën, duke bërë që mbrojtësi Jose Gimenez ta shoqëronte jashtë fushës me kujdesin e duhur.

Zogu dukej sikur ishte goditur nga topi dhe mbrojtësi i madrilenëve, Gimenez, i cili tashmë kishte asistuar për golin hapës të Alexander Sorloth në minutën e pestë, e mori atë dhe e çoi në vend të sigurt, duke bërë 'asistin' e tij të dytë të mbrëmjes.

“E pyeta gjyqtarin se çfarë po ndodhte. Ai më tha se ishte për shkak të pëllumbit dhe unë i thashë: ‘Seriozisht? E ndalët ndeshjen për shkak të pëllumbit?’”, tha Gimenez për mediat spanjolle. "E mora unë. Nuk e di nëse supozohet të ketë ndonjë protokoll. Shpresoj të mos jetë lënduar rëndë", tha ai pas ndeshjes.

Ky gjest bëri që afro 61 mijë tifozët e pranishëm në 'Metropolitano' të duartrokisnin mbrojtësin.