Gjykata Superiore e Drejtësisë Sportive në Brazil ka vendosur skualifikimin e mbrojtësit të Internacional Porto Alegre, Victor Gabriel, pas ndërhyrjes së rëndë ndaj sulmuesit të Cruzeiros, Gabriel Pec.

Incidenti ndodhi gjatë një ndeshjeje kampionati, ku ndërhyrja e mbrojtësit shkaktoi një thyerje në këmbën e majtë të sulmuesit. Fillimisht, Victor Gabriel u dënua me 6 ndeshje pezullim, por më pas gjykata e zgjati masën disiplinore duke e lidhur atë me rikthimin e Gabriel Pec në stërvitje.

Sipas vendimit, mbrojtësi do të mund të rikthehet vetëm pasi kundërshtari i tij të jetë sërish në gjendje të stërvitet, me një kufi maksimal prej 180 ditësh pezullim. Parashikohet që Pec të mungojë rreth 3 deri në 4 muaj për shkak të dëmtimit.

Victor Gabriel ka të drejtë të apelojë vendimin, ndërsa ka mohuar se ka pasur qëllim për të dëmtuar kundërshtarin. Mbrojtësi i Internacionalit ka deklaruar se fusha e rrëshqitshme ndikoi në aksionin e tij dhe se ndërhyrja ishte një incident i padëshiruar.

“Ishte vërtet një moment i pakëndshëm. I kërkova falje dhe i ofrova mbështetjen time të plotë”, u shpreh Victor Gabriel pas episodit.

Vendimi i drejtësisë sportive braziliane ka tërhequr vëmendjen, pasi pezullimet zakonisht lidhen me numrin e ndeshjeve, ndërsa në këtë rast dënimi u kushtëzua drejtpërdrejt me gjendjen shëndetësore të lojtarit të dëmtuar.