Tirana 1-2 Partizani në derbi, bardheblutë 'agjërojnë' prej shtatë ndeshjesh! Djemtë e Fagut komplikojnë pozitat për 'Final 4', Maguette hero

Pas ndeshjes derbi Tirana 1-2 Partizani, për mediet foli drejtori sportiv i të kuqve, Olsi Rama. Ai lë mënjanë rivalitetin dhe thotë se Tirana për cilësitë që ka duhet të jetë në "Final 4".

"Jam shumë i lumtur për këtë fitore sot. Kjo fitore i dedikohet presidentit të nderit, Resul Demit. Ai është tifozi i parë i “Guerrilsave". Jam shumë i kënaqur, sepse janë dy fitore në dy derbi. Jam shumë i kënaqur nga Maguette, sepse tregoi nivelin e tij. Por nuk jam i kënaqur vetëm me atë. Stafi po arrin që fizionominë e tyre të lojës ta përcjellin edhe te lojtarët.

Duhet të jemi shumë të përgatitur për ato dy ndeshjet e fundit, sepse s’kam pasur kurrë dyshim që do të jemi aty. Mendoj që "Final Four" duhet të jetë me ekipet më të mira të Shqipërsë. Tirana i ka kualitetet dhe meriton të jetë aty. Këtë javë kemi një ndeshje (Skënderbeu) që unë e vlërësoj po aq të vështirë sa derbi. Shpresoj që ekipi që do ta fitojë, ta meritojë dhe shpresoj që të jemi ne", tha Olsi Rama.

Partizani fitoi 1-2 kundër Tiranës në derbi duke komplikuar situatën e bardhebluve për në "Final 4". Pas ndeshjes për mediet folën edhe protagonistët e stolave.

Për trajnerin e Tiranës, Erbim Fagun, nuk ka mbetur më asgjë vetëm se të fitojnë tre ndeshjet e mbetura për të siguruar ndeshjet shtesë në "Final 4" për titullin kampion.

“Në radhë të parë më vjen keq për këtë humbje, sepse kemi zhvilluar një ndeshje të mirë. Shpresoj të luajmë kështu në këto ndeshje të mbetura, për të arritur objektivin tonë "Final 4". Presioni është prezent në ndeshje të tilla. Pas kartonit të kuq u prishën ekuilibrat.

Na mungoi edhe fati. U ndje lodhja fizike nga Kupa. E kishim një plan B, por u kushtëzuam shumë nga kartonët e verdhë që morën. Ndryshuam shpesh herë zëvendësimet që donim të bënim. Në çdo faull merrnim karton të verdhë, nuk e kuptoj këtë.

Kjo na kushtëzoi te zëvendësimet, sepse u munduam të hiqnim lojtarët që kishin karton të verdhë, për të shmangur daljen me të kuq. Patjetër që e mendojmë gjatë gjithë kohës "Final 4". Por për të arritur aty duhet të fitojmë të gjitha ndeshjet që na kanë mbetur. Nuk ka rrugë tjetër. Kam shumë besim, sepse në ndeshjet e fundit kemi luajtur shumë mirë. Kemi krijuar raste dhe kemi pasur stabilitet. Në tre ndeshjet e fundit do të japim gjithçka për gjithçka, sepse nuk kemi çfarë të humbim", tha Fagu.

Nga ana tjetër, Orges Shehi i Partizanit mundi ish-ekipin e tij duke thënë se dominuan.

“Është një fitore e rëndësishme. Fitore përballë një rivali historik. Për mua më të rëndësishëm janë ata që janë në stol se sa ata që e nisin nga fillimi. Kur ndërrimet bëhen shpejt për çështje dëmtimesh, çekuilibrohesh. Mendoj që kemi fituar një ndeshje të dominuar.

Fitorja është për të gjithë tifozët, por në veçanti për presidentin tonë. Babai i tij është në një gjendje kritike, kështu që këtë fitore ia dedikoj atij. Ka qenë periudhë që asnjëherë nuk kemi qenë të plotë. Vetëm në Rrogozhinë.

Kur ke kontigjent të plotë, nuk ke dyshime dhe kërkon të implementosh atë që ti kërkon. Jam i kënaqur me atë që skuadra po jep. Po e kuptojnë që është fazë e rëndësishme dhe po tregojnë karakter dhe uri për fitore.

Maguette është lojtari ynë pothuajse më i rëndësishëm. Kur ke performanca të tilla ofertat janë të pranishme. Por ne nuk prishim çdo gjë për të transferuar lojtarët. Mbetet për t’u parë", tha durrsaku.

Derbi Tirana - Partizani do e gjejë stadiumin "Air Albania" pa stola në pjesën pas portave, aty ku qëndrojnë edhe tifozët ultras të të dyja skuadrave. Organizatorët kanë marrë masa që sharjet mos nisin konflikte me sende të forta si në ndeshjet e kaluara, duke ruajtur edhe thyerjen e stolave, që është kthyer në një "traditë" tanimë. Edhe për shkak se një stol vlerësohet 100 euro dhe klubet respektive duhet të paguajnë dëmet, ulëset janë hequr nga pjesët pas porte.

Tirana dhe Partizani luajnë këtë mbrëmje në 19:00 në "Air Albania". Trajnerët Erbim Fagu dhe Orges Shehi kanë bërë publike edhe formacionet zyrtare të sfidës.

Formacionet zyrtare:

Tirana: Kozi, Mici, Hoxhallari, Përgjoni, Lulaj, Haxhiu, Jonuzi, Deliu, Lushkja, Abazaj, Patrick

Partizani: Qirko, Buxhelaj, Sembene, Sotaj, Maguette, Murataj, Rrapaj, Taipi, Cara, Bintsouka, Mba