Vihet në punë sistemi dixhital, si do të mbrohet vija bregdetare nga abuzimet (VIDEO)

TIRANE - Mbrojtja e vijës bregdetare nga abuzimet e shumta që nga zënia e plazheve publike nga privatët e deri te ndërtimet pa leje, tashmë do të vëzhgohet më një sistem dixhital, i cili do të jetë i aksesueshëm për të gjitha institucionet, duke shmangur kështu jo vetëm  procedurat burkoratike për përgjegjësitë institucionale, por duke kontrolluar edhe detyrimet tatimore për secilin subjekt që vepron në bregdet.

Kryeministri Edi Rama njofton përmes rrjetit social Facebook, se ka nisur puna për vijën bregdetare 2020.

"12 mijë e 132 fotografitë e para, të cilat mbulojnë 180 km bregdet me plazhe dhe mbi 30 mijë të tjera, që do t’u bashkangjiten në javët në vijim, përbëjnë pasqyrën digjitale të reformës së nisur për kontrollin, mbrojtjen dhe zhvillimin e Vijës sonë Bregdetare.

Kjo pasqyrë digjitale, e cila do të përditësohet vijimësisht, do të prodhojë të gjitha të dhënat e nevojshme për pronësinë publike a private, ndërtimet abuzive, aktivitetet hoteliere dhe njësitë e shërbimit (bashkë me statusin e tyre juridik e tatimor), hotspotet mjedisore, monumentet e kulturës e zonat e mbrojtura.

Të gjitha institucionet dhe strukturat të shtetit, të cilat do të përfshihen në zbatimin e Ligjit të ri për Vijën Bregdetare, do ta përdorin këtë pasqyrë për planifikime, verifikime dhe operacione në terren, në funksion të qëllimit për t’u ofruar qytetarëve një Shqipëri turistike shumë më cilësore; me plazhe të lira, shërbime publike të aksesueshme dhe shërbime tregtare të formalizuara, mjedis të mbrojtur e zhvillim të qëndrueshëm të infrastrukturës së mikpritjes", shkruan Rama.

G.M./r.k./Shqiptarja.com

TAG:
• edi rama
• vija bregdetare 2020
• sistem dixhital