TIRANE-Kryeministri Edi Rama ka sjellë përmes një video pamjet nga Nju Jorku të situatës nga koronavirusi, të cilat i cilëson 'pa koment'. Në kronikë thuhet se spitalet në Nju Jork po i transportojnë viktimat me kamionë.
"Ndërsa numri i viktimave rritet në qytetin e Nju Jorkut për shkak të shpërthimit të Covid-19, disa spitale kanë marrë masa të dëshpëruara, për të përballuar dallgën e egër. Trupat e viktimave të Covid-19 janë parë duke u ngarkuar në një kamion me frigorifer, duke përdorur një vinç, jashtë qendrës spitalore të Bruklinit këtë fundjavë, ndërsa numri i të vdekurve të qytetit tashmë ka kaluar 1000.
Agjencia e lajmeve britanike The Independent raportoi se arsyeja e përdorimit të këtyre kamionëve ishte nga pamundësia e spitaleve për të mbajtur numrin e shtuar të kufomave në morgun e tyre. Deri të hënën, më shumë se 66 mijë njerëz, kanë rezultuar pozitivë në Nju Jork, dhe 1218 prej tyre vdiqën, për shkak të virusit” thuhet në kronikën e shpërndarë nga Rama, duke paralajmëruar kështu qytetarët shqiptarë që të respektojnë masat e marra dhe të qëndrojnë brenda për të shmangur skenarët tragjikë.