Vlerësimi i punonjësve socialë, 1/3
nuk kualifikohet, shansi 2 në jana

Ministria e Mirëqenies Sociale dhe Rinisë ka publikuar këtë të hënë rezultatet e vlerësimit të të gjithë punonjësve socialë që shërbejnë në institucionet e përkujdesit social publik në nivel vendor dhe qendror. Sipas rezultateve të testimit, afro1-3 e të gjithë punonjësve socialë që iu nënshtruan testit nuk janë kualifikuar.

Në një prononcim për mediat drejtoresha e Përgjithshme e Politikave Sociale, Merita Xhafaj, tha se nga 557 punonjës të institucioneve të përkujdesit social publik që ofrojnë shërbime për fëmijët në nevojë, fëmijët me aftësi të kufizuara, të moshuarit, viktimat e trafikimit, viktimat e dhunës në marrëdhëniet familjare, 384 janë kualifikuar dhe pjesa tjetër prej 173 punonjësish nuk kanë mundur ta kalojnë testin.

Por sipas Xhafaj, për punonjësit e pakualifikuar do të krijohet një mundësi e dytë në mënyrë që t’i nënshtrohen një vlerësimi tjetër në muajin janar.
“Në zbatim të legjislacionit në fuqi për punonjësit që nuk janë kualifikuar, sqarojmë se ata do të rivlerësohen në muajin janar 2016. Këto pozicione pune do të konsiderohen vakante dhe vlerësimi do të jetë i hapur jo vetëm për 173 punonjësit ekzistues, por edhe për të gjithë personat e interesuar për t’u punësuar në institucionet e përkujdesit social publik”, sqaroi Xhafaj.

E nëse përsëri 173 punonjësit aktualë nuk do të kualifikohen, ata automatikisht do të largohen nga vendi i punës dhe do të zëvendësohen me ata që do të kualifikohen në vlerësimin e muajit janar 2016.

Redaksia Online
(u.s/shqiptarja.com)